Amerikamiut aallartitaqarfiat qaartartumeerneqartoq

Ullaaq manna Grækenlandip illoqarfiisa pingaarnersaanni Athenimi Amerikamiut aallartitaqarfiat qaartartumeerneqarujussuarpoq.

Peqatigiit saamerliuniartut imminnut ”Mumisitsiniartut” taagortut saassussisimapput.

- Marloriarluta aterminnik taaserusunngitsunik sianerfigineqarpugut, sianertut oqarput namminneq Mumisitsiniartuullutik aallartitaqarfimmullu saassussisuullutik, taama Grækenlandimi Naalagaaffimmi pissutsinut ministeri Byron Polydoras oqarpoq.

Oqaatigineqarporli qaartitsisoqarnerani inunnik ajoqusertoqarsimanngitsoq.

Takunnittut ilaat politiinut oqarsimavoq, qaartartoq igeriuttagaq anartarfimmut aallartitaqarfiup illutaata quleriit pingajuanniittumut igeriunneqarsimasoq. Allalli takunnittut aamma oqarsimapput angutit marluk motorcykelertut qaartartumik igeriuttakkamik igeriussisimasut.

Grækerit politiivisa tamanna pinartutut isigaat, tassami amerikamiut Grækenlandimi ambassadøriat quleriit pingajuanni allaffeqarsimammat.

Maannakkullu amerikamiut Athenimi aallartitaqarfiat paaqqutareqqissaarneqartoq oqaatigineqarpoq.