Amerikamiup 57-inik ukiullip puulukip uummataanik uummatilerneqarnera iluatsilluartoq

Puulukip uummataanik inummut uummatiliineq amerikamiut nakorsaannit pilattaasartunit siullermeertumik iluatsinneqarpoq.

University of Marylandsip nakorsaanermut immikkoortortaqarfia ataasinngornermi taama paasissutissiivoq.

Suliarinninneq tallimanngormat naammassineqartoq nunarsuarmi suliarinninnerni siulliuvoq. Suliarinninnerup uumasup uummataata inuup timaanit ajorineqarani atorneqarsinnaanera takutippaa, universitet nalunaarummi allappoq.

57-inik ukiulik, David Bennett Marylandimeersoq puulukip uummataanik uummatilertippoq. Taanna inummit allamit uummatilertinnissamut naleqqutinngitsutut siusinnerusukkut nalunaarutigineqarsimavoq.

Bennett suliaritereernerup kingorna uummatip ilaa qanoq innersoq paasiniarlugu nakkutigilluaqqissaarneqarpoq.

- Toqunissara imaluunniit uumatilertinneq una naammassiniarlugu aalajangernikuuvunga. Inoorusuppunga. Taamungaannaarneruvoq, kisianni periarfissara kingulliuvoq, Bennett suliaritinnissani sioqqullugu sisamanngornermi oqarpoq.

David Bennett qaammatini kingullerni amerlasuuni siniffimmi nalaannarsimavoq, piffissallu ilaani anersaartuuteqartinneqartarsimalluni. Taamaammat peqqisseqqikkuni ”siniffimmit massinnissani qilanaaralugu” sisamanngormat ilanngullugu oqaatigaa.

Immikkut ittumik suliarinninneq USA-mi nakorsaateqarnermut aqutsisoqarfiup, FDA-p ukiortaap unnuani pinasuartumik akuersissutigaa.

- Suliaqartarnermut aqqutissiuussineruvoq, timip atortuinik amigaateqartarnermut aaqqiiniarnermut alloriarnissamut qaqinnerulersitsisoq, Bartley Griffith suliarinnittoq oqarpoq.

- Mianersuinnassaagut, kisianni suliarinninneq una nunarsuarmi siulliusoq napparsimasunut siunissami nutaatut periarfissaassasoq pingaaruteqartoq neriulluarfigaarput.