Amerikamiu assiliisartoq Rockwell Kent Nunatsinni 1930-kkunni sulillunilu najugaqarpoq.Assi: Archives of American Art/Flickr Creative Commons

Amerikamiup 30-kkunni assilisai ilisimatusarfigineqalersut

Amerikamiup assiliisartup Rockwell Kentip Nunatsinni 1930-kkunni sulillunilu najugaqartup suliai, ilisimatusarluni suliniummi nutaami Nunatsinneersunit amerikameersunillu peqataaffigineqartumi misissuiffigineqartussanngorput.

Rockwell Kent Nunatsinni ilaatigut Illorsuarnut, Uummannamut, Sisimiunut Nuummullu 1930-kkunni angalasarnermini assilisarpassuaqarpoq eqqumiitsuliaqarlunilu.

Ilisimatuut, Nunatsinneersut marluk USA-meersullu marluk, illoqarfiit 30-kkunni assilineqarsimasut 2016-ip ingerlanera tikeraarniarpaat, Rockwell Kentip assilisai illoqarfinni pineqartuni najugaqartunut takutinniarlugit, inuiaqatigiillu 30-kkunnit maannamut allanngoriartorsimanerat eqqartuisinniarlugit.

Nalitsinni meeqqat inuusuttullu suliniummi qitiutillugit sammineqassapput. Ilisimatuummi angalanerminni meeqqanut inuusuttunullu assiliisarnermik immikkut sammisaqartitsiniarput, assiliisarnermi periaatsinik ilinniartitsissallutik meeqqallu inuusuttullu nammineerlutik assilisaat illoqarfiini nunanilu tamalaani saqqummersinneqassapput.

Nunatsinnit peqataasussat tassaapput Ilisimatusarfimmeersut Axel Jeremiassen aamma Jette Rygaard, USA-miillu Denis Defibaugh aamma Susan Vanek.

Suliniut Amerikami Rochester Institute of Technology aamma Binghamton University suleqatigalugit ingerlanneqassaaq, USA-milu ilisimatusarnermut aningaasaateqarfik, National Science Foundation, ilisimatusarnissamut aningaasaliisuuvoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl