Tusagassiuut: Amerikamiu uuliasiortuni pisortaq Ittoqqortoormiini innuttaasunut ataatsimiititsilersoq
Amerikamiut uuliasiorfianni, Greenland Enerymi pisortaq, Robert Price Ittoqqortoormiini innuttaasunut unnugu nalunaaqutaq 19.30 ataatsimiititsiniarluni angalavoq.
Tusagassiorfik Danwatch taama allaaserisaqarpoq.
Suliffeqarfik uulianik nappartanik 13 milliardinik amerlassusilinnik Jameson Landimi ukiup ingerlanerani pissarsinissaminik naatsorsuuteqartoq KNR-ip siusinnerusukkut allaaseraa.
Suliffeqarfiup pisortaa, Robert Price Sulisitsisut ataatsimeersuartitsinerannut, Future Greenlandimut Amerikamiullu Nuummi sinniisoqarfiata allaffittaavata ammaanersiorneqarneranut peqataajartorluni qaammatip siuliani nunatsinniippoq.
Præsident Trumpip nunatsinnut immikkut aallartitaa, Jeff Landry aamma Nuummiippoq. Taannalu nunatsinneereerluni angerlaqqikkami Fox Newsimit apersorneqarpoq. Taannalu Robert Pricep tamanut saqqummiussimasaata assinganik oqariartuuteqaqqippoq:
USA-p nunap iluanit uuliat nappartat 2 millionit ullormut qallortarniarai, Jeff Landryp oqaatigaa. USA-p Kalaallit Nunaatalu akornanni isumaqatigiissut nunarsuup kitaaniittut USA-p Iranillu Hormuzstrædimi sorsunnerata kingunerisaanik uuliamik ajornartorsiuteqarnerannut iluaqutaassasoq aamma oqaatigaa.
Geus Grønlandilli aatsitassanullu naalakkersuisoqarfiup pisortaata, Jørgen Hammeken-Holmip uuliamik taama nassaartigisoqarnissaa ilimanarpallaanngitsoq, KNR-imut oqaatigeerpaat.
Greenland Energy misiliutaasumik qillerinissamut akuersissuteqarfigineqanngitsoq, Jørgen Hammeken-Holmip KNR-imut sapaatip akunnerata siuliani paasissutissiissutigaa. Taakkumi sumiiffimmi misissueqqaaginnartussaapput.
Naallu Amerikamiut Ittoqqortoormiit eqqaanni uuliasiungaatsiarnissaat ukiup naannginnerani aallartilinngikkaluartoq, paasissutissaq tamanna Ittoqqortoormiinut anngussimanngilaq.
Danwatchip najukkami ataatsimiititaliap siulittaasua Namminersorlutik Oqartussanut isornartorsiuisoq oqaloqatigaa.
Najukkami piumasaqaatit
Ittoqqortoormiini najukkami siunnersuisoqatigiit Greenland Energymut innuttaasunik ataatsimiititsisoqarnissaa sioqqullugu arfinilinnik piumasaqaasiorput.
Taakku Robert Price timersortarfiup allilerneqarnissaanut, containerimik timigissartarfiliornissamut, silami wellnessiliornissamut, kissartumik naluttarfiliornissamut kiisalu piniartunut illuaqqanik nutaanik sanaartornissamut aningaasaliinissamut atsiortikkusuppaat.
- Isumaqatigiissut akuerinngippassuk assersuiniarluta innuttaasut oqaloqatigaakka. Umiatsiaaqqagut atorlugit, Hans Brønlund Danwatchimut oqarpoq.
Najukkami siunnersuisoqatigiit Greenland Energy qulimiguulimmik attartorluni sumiiffimmik assiliortuissasoq piumasarigaat, Hans Brønlundip oqaatigaa.
- Innuttaasut taamaalillutik qilleriffiuniartumut nunamillu aserorteriffigineqartumut alakkaasinnaapput. Sumiiffiup tamarmi assiliortorneqarnissaa kissaatigaarput, taamaalilluta eqqaassutissarisinnaassallutigu, Hans Brønlund Danwatchimut oqarpoq.
Paasissutissat amigartut
Ken Madsen Ittoqqortoormiini inunngorlunilu peroriartorpoq. Taassuma najukkamiittut amerlanerpaartaasa Jameson Landimi uuliasiornissamut pilersaarutit ilisimasaqarfigivallaanngikkaat Danwatchimut oqaatigaa.
- Oqartussat tungaanniit paasissutissarsisarnerput annikitsuararsuummat kiap tikilernera susoqalernera amerlanerpaat ilisimanngiivippaat, Ken Madsen Danwatchimut oqarpoq.
Greenland Energyp Amerikamiut præsidentiata Kalaallit Nunaannut oqartussaaffeqalernissamut kissaateqarneranik suliaqartunit ilaannik attaveqarfeqarnera Ittoqqortoormiini ilisimaneqanngilaq.
- Suliniummut angisoorujussuarmut atatillugu isummeriataarnissannut ilisimasaqarnerunnginnerput alianartorujussuusoraara. Innuttaasut ataasiakkaat tamanna sunniuteqarfigisinnaanngilaat. Namminersorlutik Oqartussat, kommunip, borgmesterip – politikerit qaffasinnerpaat – peqataanerusariaqarput, Ken Madsen Danwatchimut oqarpoq, nangillunilu:
- Suliniutip avatangiisinut kingunerluuteqangaatsiannginnissaa qanoq qulakkeerneqassanersoq paaserusuppara. Qilleriffiginiagaannimi umimmanniartarpugut.
Namminersorlutik Oqartussat suliffeqarfik nersualaaraat
Danwatchip naalakkersuisoqarfiup pisortaa, Jørgen Hammeken-Holm oqaaseqartippaa.
Taassuma Aatsitassanut Naalakkersuisoqarfiup Greenland Energy innuttaasunut ullumikkut ataatsimiititsiniartoq ilisimanngikkaa tusagassiorfimmut oqaatigaa.
Taassumali suliniut nersualaarutigaa.
- Innuttaasunut paasissutissiisoqarnerunera pitsaanerussaaq. Malittarisassat, najoqqutassat, piumasaqaatillu piumasaqaatigisagut suliaqarnermi malinneqarpata ernumassutissaqarpallaanngilagut, Jørgen Hammeken-Holm til Danwatchimut oqarpoq, nangillunilu:
- Suliaqarneq inatsisinik unioqqutitsinerunngilaq, Greenland Energy taakkuninnga malinnikkuni oqaatigisagullu tamarmik iliuuserigunigit ajornartorsiutigissanngilagut.
KNR-ip nunanut allanut, inuussutissanut aatsitassanullu naalakkersuisoq, Múte B. Egede (IA) oqaaseqartinniarsaraa.
