Amerikamiu tv-miittartoq Matt Lauerip nunarput nuannareqaa
Matt Lauer tv-qarfiup nittartagaani, msnbc.com-imi ullumikkut apersorneqarsimavoq, tassanilu atuarneqarsinnaavoq nunatsinnut tikeraaqqikkusuttorujussuusoq – tamannali ukiualuit arlallit qaangiuppata pinissaa naatsorsuutigaa, tassami nunatsinnukaqqileruni meeqqani angalaqatigerusukkamigit, taakkulu angalanerminnit pissarsissagunik anneruleqqaartariaqarput. Matt Lauer-ip misigisaasa annersaraat qulimiguulimmiit qaqqajunnamut, sermimut iigartartumut isikkilivimmut niuneqarami.
- Inuulillaramali aatsaat taamaattumik isigisaqarpunga – tamannalu puigunngisaannassavara, Matt Lauer nittartakkamut oqarpoq – misigisanilu nunarsuarmi qaqqat portunersaata, Mount Everestip naqqani misigisaminut assersuullugu.
- Kisianni Mount Everest-ip qaavaniit isikkivik takunikuunngilara – taamaallaat ataaniit qummut isiginnaarnikuugakku. Ilulissat eqqaanni sermersuaq nunarsuarmi qeqertat annersaata 80 procentianik qalliisimasoq takusinnaavara. Taanna isigilerakku qanoq mikitigissusera siornatigut misigisimanngisaannagara misigaara, Matt Lauer oqarpoq.
Akerlianik angallammik nutanngitsumik angalaarnini nuannaarutigivallaanngilaa – tassami angalaartillugit anorlilerpoq Amerikamiullu tv-liortut nuanniilliortileraluarlugit.
Nittartakkami tv-kkut toqqaannartumik aallakaatinneqartunut oqaaseqaatit aamma atuarneqarsinnaapput – Amerikamiullu nunarput pillugu paasinnikkusunnerat eqeersarneqarsimasoq qularutissaanngilaq – isiginnaartartullu ataatsip Ilulissaniit aallakaatinneqartut qiortariarlugit unnukkut aallakaateqqinneqarnissaat siunnersuutigaa, taamaalilluni Amerikamiut amerlanerusut nunatta ilamininnguanik takusaqarsinnaaniassammata.