VIDEO Amerikamiu nunatsinni najugalik: Pissutsit allaanerungaarput
Qaammat kingullerli qinersereersimavoq.
- Taamaasiortuaannarpunga. Misigissuseqarnaqaaq eqqarsaaterpassuaqarnarlunilu, Ruth Montgomery-Andersen taama oqarpoq.
Ruthip innuttaaqatai ullumi qinersipput. Ruthilu takornariaqarneq pillugu ullumi ataatsimiikkaluarluni,
pissangavoq:
- Pissangalaarpunga. Eqqarsaatigillattaagakku USA-mi qinersineq.
Ruth Montgomery-Andersen Amerikami Texasimeersuuvoq. Ukiunili 20-ni kingullerni nunatsinni najugaqarluni.
Amerikamiutulli innuttaasutut suli allaqqagami, qinersinissani pingaartitaraa.
- Oqartussaaqataaneq atorlugu qinersisimanermi soorunami qinikkap pinissaa neriuutiginarpoq. Qinersinermi aamma oqartussaaqataanermi kivitseqataasarput, Ruth oqarpoq.
Qineqqusaarnerlu amerikamioqatini milliuunilippassuit assigalugit malinnaavigisimavaa.
- Pissutsit allaanerungaarput. Kippareqqissaartumik itisiligaanngitsumillu qineqqusaarnermi sammineqartut oqallisigineqarput, Ruth oqarpoq.
Ruthip kina qinersimanerlugu oqaatiginngilaa.
Amerikamiilli ungasikkaluarluni, soraaruni, qinersinerup inernerinik malinnaassamaarpoq.
- Piffissaqassaguma fjernsynissaanga. Uannulli pingaaruteqarneruvoq piffissami tassanerpiaq ilaquttama oqaloqatiginissaat, Ruth oqarpoq.
Aammami qinersineq pillugu anaanani, suli Texassimiittoq, attaveqarfigilluarpaa, pingaartumik ullumi:
- Anaanaga sianerfigeqqammerpara. Akunnernik pingasunik nikingavugut malinnaaqatigiillutali. Skypekkut oqaloqatigiikkatta aamma allaffigillattaarpugut, Ruth taama naggasiivoq.