ASSIT Amerikamiu eqqumiitsuliortoq Ilulissat Mittarfianni suliaqartoq
Eqqumiitsuliaq ima qalipalluagaatigaaq allaat assilisatut isikkoqarluni, naak assiliivimmik assilisaanngikkaluartoq, qalipaatimmi orsutaqanngitsut atorlugit qalipagaavoq.
Eqqumiitsuliortoq Zaria Forman, eqqumiitsuliamik sulininiutiminut Chasing the Lightimut atatillugu Ilulissaniippoq, misigissutsimigullu aamma attorteqqasimaqaluni, tassani arnami arsai Qeqertarsuup Tunuani aamma siaruarteramigit.
Silallu pissusiata allanngoriartornerata nalunaarsorneranut atatillugu aamma assileeqattaarluni. Assilisani aallaavigalugit namminerlu toqqakkani aallaavigalugit Zaria Formanip assilisat qalipaatit orsutaqanngitsut atorlugit titartakkanut 23-nut angerlanereernermi kingorna suliareqqilersimallugit.
Kalaallit Nunaata takornariarfissaqqissutut nittarsaannneqarnerata eqqumiitsuliortumik amerikamiumik suleqateqarnikkut nukittorsarneqarnissaa neriuutaavoq, pingaartumik inuit internetikkut attaveqaqatigiittarfiisigut:
- Zaria Formanimik suleqateqarnerput nuannaraarput, peqqutigalugu sularisartagai tusaamasaammata, Kalaallit Nunaannilu pinngortitap nunarsuarmi takussaanerulerneranik massakkut kinguneqareermat, Visit Greenlandip avammut attaveqarneranut siunnersortip Sarah Woodallip oqaatigaa.
Zaria Forman, attaveqaqatigiittarfikkut instagramikkut 61.000-inik malinnaasoqarpoq, Visit Greenlandillu oqaatigaa Formanip assilisai tassuuna takutitassiarineqartartut, aviisinillu atuagassianillu soorlu New York Timesimit, National Geographicimit Huffington Postimiillu ilaatigut takutinneqartarlutik.
