Amerikamiu aanagigaluami qalipagaanik ujarlertoq
Aanama Arla Knudsenip atsiorsimasaanik titartagaateqarpit imaluunniit qalipagaateqarpit? Atuagassiami Tidsskriftet Grønlandimi ilanngussat ilaat taama oqaasertaqarpoq. Douglas Nicolaisen aanami eqqumiitsuliaanik ujarlerluni taama saaffiginnissuteqarpoq.
Arla Nicolaisen, katinnginnermini Knudseniusoq, 1927-imit 1939-mut Kalaallit Nunaanni najugaqarpoq, Nunatsinnut tikikkami meeqqanik paarsisooqqaarpoq - kingusinnerusukkullu niuertumut V.B.K. Knudsenimut katilluni. Piffissami tassani kalaalerpaluttunik qalipagarpassuaqarsimavoq, ilaatigut ilaqutariit najugarisimasaanni Sisimiuni, Appani kiisalu Kangersuatsimi Upernaviup pigisaani.
- Assilissamik nassaaraangatta allaaneq ajorpoq illernartumik nassaarluta. Suliarisartagaata qanoq annertutigineri qalipagaasalu ilisimasaqarfigilernissaat pillugu ujaasivunga. Qalipagaanik aatsaat takusannik nassaaraangama allaaneq ajorpoq juulliasiuinnarluni, Douglas Nicolaisen oqarpoq.
Ilaqutariit qalipakkat 80-90-t missaat pigisaraat, taakkulu USA-mut tamarmut siaruarsimapput. Amerlanersaat kalaalerpaluttunik assiliartaqarput, soorlu seqernup tarrilernera, nuna inuillu sammisaqartut, soorlu assersuutigalugu qaanniortut.
Douglas Nicolaisen aanagigaluami qalipagaanik ujarlernini 2005-imi aallartippaa.
- Qalipakkami amerlanersaannik - tulluusimaarutigeqisani - tunissutitut allanut tunniussisimanissaa ilimagaarput. Qalipakkat pigisatik immikkoortiterlugit suliarereersimavai.
ilaatigut niuertuusimasumit Per Bistrupimit attaveqarfigineqarsimavoq, taanna nukappiaraalluni Arla Knudsenimit assilineqarluni qalipagaateqarluni.
Douglas Nicolaisen qalipakkanik piserusunngilaq, aanamili qalipagaanik katalogimut, atuakkamut imaluunniit nittartakkamut assiliinnarusulluni.
Arla Knudsenip qalipagai Arla Knudsenimik imaluunniit Arla K-mik atsiorneqarput, taama ittumillu nivingasuuteqaruit Douglas Nicolaisenilu ikiorusullugu, allaaserisamik allaaserinnittoq attaveqarfigisinnaavat, taassumalu saaffiginnissutit ingerlateqqikkumaarpaa.
