Amerikami senatori, Edward Kennedy, ullaaq toquvoq.
Edward Kennedyp Demokratiusup peqqissaaveqarneq pillugu sorsuuteqarnera naggataagut inuttaanut attuumassuteqarluinnalerpoq.
Qaratsamigut kræfteqarluni paasigamiuk sorsuutigiuakkani qanilluinnartumik misigilerpaa. Sorsuutigisaali arlalissuupput. Amerikamiut akissarsiaqarnerulernertik ammillu qalipaataa pillugu immikkoortitsivallaarunnaarneq pillugit qatanngutigiit Kennedykkut nukarlersaannut qujaniutissarpassuaqassapput.
Edward Kennedy qatanngutigiinni nukarliuinnanngilaq, 1962-imimi 30-nik ukioqarluni Massachusettsimi qinigaagami senatorini nukarlersaalluni qinigaavoq.
1969-imi præsidentinngorniarnerminik takorluugai ajutoornikkut pisinnaajunnaarput. Biilimimmi taamani ingerlatitsisuulluni ikaartarfikkoorluni kuummut nakkarpoq, ilaasualu arnaq ipilluni ajunaarpoq. Edward Kennedyp ajutoornini aqaguani aatsaat nalunaarutigaa.
Ajutoorneq taanna pillugu qinigaaffiit qaffasinnerpaartaat angusinnaajunnaarpaa siornali USA-mi præsidentissamut qinersisoqartussaasoq Barack Obamamik tapersersuinera ima pingaaruteqartigaaq qinersinermi allaat aalajangiisuulluinnarluni.
Edward Kennedyp toqukkut qimagunnera præsident Barrack Obamap tusaramiuk aliatsaatigerujussuarsimallugu oqaatigaa.
- Oqaluttuarisaanitsinni kapitali pingaaruteqartoq tamaanga naavoq, præsidenti oqarpoq.
Edward Kennedy Washingtonip eqqaani iliveqarfimmi Arlingtonimi arfininngorpat ilisaassaaq, tassanissaaq qatanngutai inuartarineqarsimasut, præsident John F. Kennedy aamma senatori Robert Kennedy iliveqarput.
