Amerikami Avannarlermi sillimmartaarput

Timmissat nappaataat Amerikamut Avannarlermut anngutissagaluarpat peqqinnissaq pillugu pilersaarut nutaaq annertoorlu ingerlaannaq atuutilersussaq taanna suliarineqaqqammerpoq.

Timmissat nappaataat sakkortuumik atugaalissagaluarpat, pilersaarut tassaavoq Nunavimmiit timmisartorlutik kujammut angalasut timmisartoqarfimmiit qimagutsinnatik nappaat pillugu mattussaaqqaartassasut. Timmisartut Montrealikkooratik Chibougamoukkoortassapput, nerisassallu nalunaaquttap akunnerini 48-ni aamma immikkoortisimaneqaqqaartassallutik. Nunatsiaq Newsimi taama allaaserinnittoqarpoq.

Nunavimmili innuttaasut Nunavimmi illoqarfimmiit illoqarfimmut angalasinnaassapput, illoqarfik aalajangersimasoq timmissat nappaataannit eqqugaassagaluarpat, taamaatoqassappammi illoqarfimmut nappaammit eqqugaasumut angalaneq mattunneqassammat.

-Aqqusineqannginnatta inuit timmisartorlutik angalanerat kisiat unitsissinnaavarput, nappaatip tuniluunnissaa taamaalilluta pinngitsoortissinnaassagatsigu, peqqinnissamut naalakkersuisoq, Serge Déry, Nunavimmi peqqinnissaqarfinni siulersuisunut ilaasortat Kuujjuarmi qanittukkut ataatsimiinneranni oqarpoq. Timmissalli nappaataannik nappaalasoqalernissaa peqqinnissamut naalakkersuisup ilimaginngilaa.