Amerika assuarineqarpoq
Issittumi siunnersuisoqatigiit Ruslandimi Siberiami ataatsimeeqatigiinneranni, isumaqatigiissutitut nalunaarusiami ministerinit akuersissutigineqartumi, silaannaap allanngoriartornera pingaarnersaatinneqarpoq. Issittumi siunnersuisoqatigiit Siberiami ataatsiminneranni nunatsinnit peqaavoq, Inuit Issittormiut Siunnersuisoqatigiiffianni sammineqartumut malinnaatitaq, ICC-milu siulersuisuni ilaasortaq, Carl Christian Olsen, Puju. Ataatsimiinnermi angusat pillugit ima oqarpoq.
-Ataatsimut isigalugu avatangiisit pillugit suliniutit assigiinngitsut ingerlaqqinnissaasa akuerineqarnerat pingaarnerusutut immaqa oqaatigineqarsinnaavoq.
Carl Christian Olsen nangilluni oqarpoq, silaannaap allanngoriartornerata unikaallatsinneqarnissaanut suliniuteqarnermi amerikamiut peqataanngippallaarnerat pillugu sakkortuumik assuarineqarsimasut, peqataanerunissaallu pillugu sakkortunerusumik piumasaqarfigineqarnissaannik ataatsimiittuni nunat peqataasut ilaat arfinillit isumaqatigiissuteqartut.
Akoorutissanik silap pissusaanut ajoqutaasunik annikillisaaniarnermut amerikamiut akerliunerat nikeriarusunnginnerallu ajornartorsiutaasoq.
- Ataatsimiinnermi danskit aallartitaannit oqaatigineqarpoq, USA-mut sunniiniarnissami allatut ajornartumik Issittumi Siunnersuisoqatigiit avataanniittut, soorlu nunat Kangianiittut, silaannarmik mingutsitsinermut aallaaviusartut, Indiakkut allallu aamma suleqatiserineqartariaqassasut.
Silannaap allanngoriartornerata annikillisineqarnissaanik suliniuteqarnermut amerikamiut pinaaserpallaarunnaartutut oqaatigineqarnerat pillugu, Carl Christian Olsen ima oqarpoq:
-Taamatut oqaatigineqarsinnaanngilaq. Suli sussaajunnaarlutik ikkarleqqapput. Taanna assortugassanngilaq. Kisianni soorunami arlalitsigut isumaqatigiinniaqatigisinnaasimavavut. Pingaartumik issittup imaatigut umiarsuarnik ingerlatsisalernissamut tunngatillugu piareersarneq, taannalu naalagaaffiit tamarmiusut peqataaffigissallugu siunniusimavaat, tassalu taanna uatsinnut ukiuni aggersuni sunniuteqartussat pingaarnersarissavaat.
Carl Christian Olsen, Puju, aamma oqarpoq, silaannap allanngoriartorneranut unikaallatsitsinissamik nunat tamalaat Kyotomi isumaqatigiissutaat, Afrikami Nairobimi qaammatip tulliani isumaqatigiinniutigineqaqqilerpat, amerikamiut pinaasernissaat ilimagigini, tamannalu pillugu ukiuni arfinilinni tulliuttuni suliniutissat ataatsimiinnermi isumaqatigiissutigineqarput.
Issittumi siunersuisoqatigiit ataatsimiinneranni angusarineqartut naammagisariaqartut pitsaanerusinnaagaluartulli, piviusorsiortumillu sulinissaq tullinnguuttoq, Namminersornerullutik Oqartussat nunanut allanut pisortaqarfianni pisortaq ,Inuuteq Holm Olsen, naliliivoq. Norgemiut Issittumi siunnersuisoqatigiinni ukiuni tulliuttuni marlunni siulittaasuuteqalerpata suleqatigiissitami uumassusilinnik sammisaqarfiusumi siuliuttaasuussaaq, ICC-lu Issittumi Siunnersuisoqatigiit Danmarkimi allattoqarfianni Københavnimiittumi aqutsisuunngussalluni.
