ASSIT Ameralimmi nuna ikuallattoq
Allaaserisaq paasissutissanik nutaanik politiineersunik nal. 09.43 nutarterneqarpoq.
Ameralimmi ippassaq nunap ikuallalerneranut ikumaartitsisoqarsimanera pissutaasorineqarpoq. Nunap ikuallannera inunnut illuaqqanullu navianartorsiortitsinngitsoq, Nuummi Politiit KNR-imut ilisimatitsipput.
Ameraliup ilaani, Qajartoriorsuarmi, Kilaarsarfiup Kapisilillu akornanniittumi, nuna ippassaq ikuallalermat Nuummi qatserisartut orniguttariaqarsimapput. Nuna ikuallattoq nunaminertami 300x300 meterisut annertutigisumi pivoq. Nunap ikuallannera inunnut illuaqqanullu navinartorsiortitsinngitsoq qatserisartunit nalilerneqarpoq.
Ikumaartitsisoqarsimanera pissutaasorineqartoq
Kommuneqarfik Sermersuumi upalungaarsimanissamut pisortap tulliata Steen Boassenip KNR-imut oqaatigaa, ikumaartitsisoqarsimagunartoq ikumaartitarlu qameeqqarnagu qimaannarneqarsimagunartoq.
Qatserisartut nuna ikuallassimasoq misissoriartoqqillugu ullumikkut Kilaarsarfiliaqqissapput.
Nuummi politiit Ameralimmi nunap ikuallassimanera KNR-imut ullaaq manna uppernarsarpaat, ilisimatitsissutigalugulu ikuallanneq inunnut illuaqqanullu navianaateqanngitsoq qatserisoqarsimanngitsorlu.
Ameralimmi Kilaarsarfimmi nunap ikuallanneranik assilisat ataani takuneqarsinnaapput. Kommuneqarfik Sermersuumi upalungaarsimanissamut pisortap tulliata Steen Boassenip assilisarai: