Ameerutit 2006-imi aamma ingerlalluarput
Puisit ameerniarneq 2004-imut naleqqiullugu 42,5 procentimik 2005-imi qaffariarsimasoq Kalaallit Nunaanni Naatsorsueqqissaartarfiup nalunaarusiaani ippassaanikkunni atuarneqarsinnaavoq.
Tamanna 2006-imi ingerlaannarsimavoq.
Ammerivik Great Greenland ullumi nalunaarpoq, puisit ameerniarneq sapaatit akunnerini kingullerni ima ingerlalluartigisimasoq, inuussutissarsiutigalugu piniartut ameerutaat 100.000-iusussat sapaatip akunnerani aggersumi immaqa sinnerneqassasut. Inuussutissarsiutigalugu piniartut Namminersornerullutik Oqartussanut 2006-imi isumaqatigiissutaanni aalajangerneqarnikuuvoq ukioq manna ameerutit 100.000-iussasut.
Ammit 100.000-t sapaatip akunnerata tulliani anguneqarpata, inuussutissarsiutigalugu piniartut ameerutaasa akii sunngiffimminni pinialuttartut ameerutaasa akiisut appasitsigilissapput.
Tassa imaappoq, inuussutissarsiutigalugu piniartut ameerutaat decembarip qaammataata annersaani affaannarmik akeqartinneqassapput.
Aataat akii ammillu panersiat akii 300 koruuniniit 150 koruuninut appassapput, natsiillu amii 285 koruunimiit 100 koruunimut appassallutik. Ammeriviup Great Greenlandip naatsorsuutigaa 2006-ip sinnerani akit taakku atuutiinnassasut.
