Amdi Petersen ilaalu parnaarussaassanngillat

Tvindhøjskolenik aallartitsisuusoq, Mogens Amdi Petersen, allallu unnerluunneqaraluartut arfineq-marluk, parnaarussaassanngillat.

Ataaseq aningaasanik peqquserluuteqarsimasutut ukiumi ataatsimi nakkutigisassanngortinneqarpoq.

Tvindimut tunngatillugu eqqartuussassanngortitaasut tamarmik, ataaseq minillugu, pinngitsuutinneqarnerat Bagmandspolitiinut ajorsarneruvoq angisooq.

Ringkøbingip eqqartuussiviani eqqartuussutip naammassinerani, eqqartuussisoq Steen Løvbjerg Nielsen oqarpoq, eqqartuussassanngortitaasut arfineq-pingasut tamarmik akileraarnerutissanik peqquserluuteqarsimasutut pinngitsuutitaasut.

Eqqartuussineq Danmarkip oqaluttuarisaanerani eqqartuussinerit annersaraat, pappiaranik quppernernik 4000-inik quppernilik.

Tvindimik aallartitsisup Amdi Petersenip illersuisua Anders Boelskifte, Ritzauimut oqarpoq, assut nuannaarlutik allamilli oqaaseqarsinnaanngikkallarluni.

Elisabeth Arnold, De Radikale-t eqqartuussiveqarneq pillugu oqaaseqartartuat oqarpoq, pineqaatissiinissamut tunngatillugu uppernarsaatit naammassimanngimmata, eqqartuussut taama inerneqartoq. Danmarkilu nersualaartariaqarnerarpaa, uppernarsaatinik peqaqqaarluni atsaat pillaatissiisoqartarmat.