Brasiliami orpippassuit ikuallattut ukioq manna qaammatini siullerni arfineq pingasuni aatsaat taama amerlatigaat.Assi: Scanpix

Nalunaarusiaq: Amazonasimi orpippassuit ikuallattut

Brasiliami orpippassuit ikuallattut ukioq manna qaammatini siullerni arfineq pingasuni aatsaat taama amerlatigaat.

Nunap præsidentiata Jair Bolsonarop Amazonasimi orpippassuit killeqanngitsumik ajoquserneqarnissaannik akuersinerata kingunerisaanik isornartorsiorneqarnerujussuata nalaani, pisortatigoortumik kisitsisit tamanna takutippaat.

Januaarip aggustillu akornanni orpippassuit ikuallanneri 73.000 missaanniittut nalunaarsorneqarput, 2018-imili tamarmi ikuallannerit 40.000-init ikinnerit nalunaarsorneqarlutik, Naalaagaaffiup Avataarsuanik Misissuiffiata (Inpe-p) qaammataasatigut nakkutilliineratigut tamanna paasineqarpoq.

2013-ip kingornatigut ikuallannerit aatsaat aatsaat taama amerlatigipput.

- Isiginnittuuffigisarput tassaavoq orpippassuarnik nungusaaneq annertusigaluttuinnartoq, Ricardo Mello Pinngortitaq pillugu nunarsuaq tamakkerlugu suliniaqatigiiffiup WWF-ip Amazon Program-ianeersoq oqarpoq.

Ukiup ingerlanerani panernerpaaffimmi, oktobarip naaneranut imaluunniit novembarip aallartinneranut killeqarajuttartumi, orpippassuarnik ikuallattoqarajuttarpoq, taamaalinerani orpippassuit uppikaatinneqartarput nuna naatsitsivissatut imaluunniit nersutinik neriniarfissatut atorneqarniassammat.

Orpippassuit arsaaffittut annertutigisut minutsit tamaasa nunguttarput, qaammataasanit paasisat takutippaat.

Ikuallannerit akuttunngitsumik inunnit nunamik naatitsivissaqarusuttunit aallartinneqartarput.

Ukiut nikinneranni Bolsonarop pissaaneq tigummagu Amazonas pillugu akisussaaffik avatangiisinut sullissiveqarfimmiit Nunalerinermut naalakkersuisoqarfimmut nuunneqarpoq, tassanilu nunalerinermik illersuisut isumaqatissarsiullaqqinnermikkut sunniuteqaqaat.

Pinngortitap ilarujussuata nunalerinermut aatsitassarsiorfinnullu atorneqarnissaanik pilersaarutini pillugit præsidenti assigiinngitsorpassuarnit isornartorsiorneqarpoq.

Orpippassuaajaanermik, aatsitassarsiornermik nunalerinermillu kiattup orpippassuinik nungusaataasunik tapersersuinini pillugu Bolsonaro avatangiisinik illersuiniaqatigiiffinnit “avatangiisit akeraannik” taaneqartarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat