Amalie Jessen illuatungiliivoq

- Assagiarsunniarnissamut akuersissuteqartarnermi asuli pisoqanngilaq – taamaallaalliuna teknikkikkut ajornartoorneq pissutigalugu kinguaattoorneqartoq.

Aalisarnermut pisortaqarfiup pisortaa Amalie Jessen taama oqarpoq.

Sinerissami nakkutilliisut 2005-imi akuersissummik peqqaaratik aalisartartut siumortarsimagaat ullo´qeqqanut tusarliupparput.

KNAPK-lu tassunga tunngatillugu uparuaavoq, pisortaqarfimmi aalisarnissamut akuersissuteqartarfik akuersiissutissanik sulinermini arriippallaamik periuseqartartoq. – Taakkuli taama uparuaanerat Amalie Jessenip akuersaanngilaa.

- Ilumoorpoq 2005-ip ingerlanerani ajornartorsiuteqalaaratta. Ukioq mannali Nuummi Paamiunilu aalisartut tamarmik januaarip aappaannili pereerput. Sisimiunili aalisarneq aatsaat apriilip aallaqqaataani aallartittussaavoq, akuersissutillu Sisimiunut marsimi nassiunneqartussaapput, Amalie Jessen oqarpoq.

Taanna isumaqarpoq, siorna ukioq mannalu pisortaqarfimmiit sullarliortoqarsimanngitsoq. Taamaallaalli teknikkikkut ajoquteqalaarneq pissutigalugu kingusinaartoqarsimasoq.