Amalie Jessen Arnatsialattut toqqarneqarpoq

decembarip 02-at 2005 16:02

Naggasiutigissavarput arnat aviisianni Arnanut-mi ullumi saqqummersumi arnatsialammik toqqaaneq.

Piniarnermi Aalisarnermilu Pisortaqarfimmi pisortaasoq Amalie Jessen Arnatsialak 2005-itut toqqarneqarpoq.

Aviisimi Arnanut-ni aaqqissuisup Inga Dora Markussen toqqaaneq ima tunngavilersorpaa:

”Arnaasugut takutittarpatsigut arnat aamma qullersat akornanni sulisinnaalluarnerannik. Arnaavutit atorfinni qaffakkiartuaarsimasoq naak sammisat angutaannarnit sullivigineqaraluartoq – aalisartunik. Nunani allani angalasarninni nunarput sinniisuulluarfigisarpat, immatsinnilu piujuaannartitsinermik aallaaveqartumik atuilluarnissaq sorsussutigigaangakku”.

Aviisillu Arnanut-p taamaalilluni Amalie Jessen pilluaqquaa. Tulliani aviisi saqqummeruni nutaamik aaqqissuisoqalissaaq. 2006-imit tusagassiortunngorlaaq Aminnguaq Dahl Petrussen aaqqissuisunngussaaq.