Assi: Aluu Airlines A/S

Aluu Airlinesip neqereroorutaa aningaasaliissutigineqartunit akisunerusimavoq

Aluu Airlinesip kiffartuussinissamut isumaqatigiissut pissarsiarinnginnamiuk naammaginagu tamanut tutsiunnikuuvoq, timmisartortitseqatigiilli isumaqatigiinniarnerit ingerlaneranni neqeroorutertik utertittariaqarsimavaat, nutaamillu akisunermik neqeroorusiortariaqarsimallutik.

Taamaammat Aluu Alirlines isumaqatigiinniarnerit naggataasersorneranni Namminersorlutik Oqartussanit aggersarneqanngillat, Aluu Airlinesimmi neqeroorutaa kingulleq siullermit millionilikkaanik akisunerusimammat.

- Ilumoorpoq, juulimi neqerooruterput apriilimi majimilu neqeroorutitsinni akisuneroqimmat, kisianni tassani sipaaruteqarlurbnissamik tikkuussivugut, taamaassappalli isumaqatigiinniutigisariaqarluni, Aluu Airlinesimi pisortaq, Pele Broberg KNR-imut oqarpoq.

Aamma atuaruk Aluu Airlinesip isumaqatigiissummik tunineqannginnini uggoraa

 

Akissaq nutaaq

Namminersorlutik Oqartussat naapertorlugit isumaqatigiinninniarnerit ataatsimiinnerillu juunip qaammataani aallartinneqarput, juunilli naalernerani Bristow Groupip, timmisartunik isumaginnittussaasup, neqeroorutertik utertittariaqarsimavaa, namminneq suliatit pissutigalugit aammalu qulimiguullit, Aluu Airlines attartugassaraluisut ittut, naatsorsuutiginngisamik attartorumaneqarnerulermata.

Tamanna namminersorlutik Oqartussat aningaassaliissutigisaannit unammillertuttullu akigitinniagannit akisunermik neqerooruteqaqqinnermik kinguneqarpoq.
Neqeroorut allanngormat, Aluu Airlines ilumut januaarip allaqqaatani 2017 sullissinissap aallartiffiani qulimiguulinnik piareersimasuuteqassanersoq, Namminersorlutik Oqartussani qularutigilerpaat.

Aamma atuaruk VIDEO Aluu Airlines timmisartornerup akikinnerulernissaanik neriuuteqalersitsivoq

Taamaakkaluartoq pisortap Pele Brobergip isumaqatigiinniarnissanut aggersarneqarsimannginnini eqqumiigaa. Tassami sullisinissamut isumaqatigiissutit nutaat nutarterinertaqanngitsut iusmaqarpoq.

Kiffartuussinissamut isumaqatigiissutini nutarterisoqarsimasoq uagut takusinnaangilarput. Taamaammat apriilip 25-ianili maajilluuunniit 8-iani isumaqatigiinniarnermut qaaqqusaasimannginnerput tupigusuutigaarput, Pele Broberg oqarpoq.

Aluu Airlines piginneqatigiiffittut januaarimi 2015 pilersinneqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl