Aluu Airlines Greenland Express Groupilu timmisartuussinissamut akuerineqartut

Naalakkersuisut aalajangiuppaat Greenland Express Group aammalu Aluu Airlines Kalaallit Nunatta iluani niuernermik aallaavilimmik ilaasunik timmisartuussisinnaanissaminnut naalakkersuinikkut akuersissummik tunineqassasut.

Tassunga ilutigitillugu Naalakkersuisut ilanngullugu aalajangiuppaat, Aluu Airlines aammalu Greenland Express Group Kalaallit Nunatsinnut aammalu Kalaallit Nunatsinniit ilaasunik angallassisinnaanissaminnut qinnuteqaataannut Angallannermut Aqutsisoqarfimmut tusarniaanermi akissummik akuersaartumik tunniussissallutik. Naalakkersuisut tusagassiorfinnut nalunaaruteqarlutik taama allapput.

AAMMA ATUARUK Air Greenland nunatsinneersumik unammillerteqalerpoq

- Aluu Airlinesip aammalu Greenland Express Groupip piffisami qanittumi pilersaarusiorsinnaalernissaannut, ussassaarilersinnaanissaannut aammalu Nunatta iluani aammalu Nunatsinnut Nunatsinniillu silaannakkut angallassinissaminnut ilaasussanut issiavissanik tuniniaasinnaalernissaannut annertuumik isumalluarpunga. Naatsorsuutigaara silaannakkut angallassinermi unammillernerup annertunerulerneratigut ilaasunut iluaqutaasumik akit appasinnerulertinneqarsinnaasut, Angallannermut Naalakkersuisoq Knud Kristiansen taama allappoq nangillunilu:

- Taamatuttaaq annertuumik isumalluarpunga silaannakkut angallannermi issiaviit amerlineqarnerisigut takornarissat amerlanerusut nunarput alutornartorsuaq immikkuullarissorlu tikeraarsinnaalissagaat. Kiisalu naatsorsuutigaara nunaqqatitta nunanut allanut angalasinnaanissaminnut periarfissaat annertusineqassasut taamatullu isumassarsianik misilittakkanik misigisanillu inuiaqatigiit Kalaallit annertuumik iluaqutigisinnaasaannik angerlaassisarnerat annerulersinneqassasoq.

AAMMA ATUARUK Greenland Express maajip aqqarnganit timmisartuusseqqilissaaq

Naalakkersuisut taamatut aalajangiinerisigut nunatta nunallu allat akornanni silaannakkut angallassisartut sisamanngussapput. Tassaappullu Aluu Airlines, Greenland Express Group, Air Greenland aammalu Air Iceland.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl