Aluminiumik mingutsitsineq kuussuarmut qanillattorpoq

Ungarnip kippasissuani aluminiumik aatsitsivimmiit aluminiup kinnganikui aappaluttut toqunartoqaqisut kuummut Rabamut maanna anngupput, kuussuarmullu Donauimut siaruariaannanngorlutik.
oktobarip 07-at 2010 05:48

Kinnganikoq kuussuup kuuttaata ilaanut, tassa kuup avaleqquanut, Mosoni-Donauimut, maanna anngussimavoq, taamaalilluni Europami kuuit annersaannut siaruariaannanngorluni.

Kuuk Marcal siulliullugu kinnganikorujussuup anguvaa, aalisakkallu tassani kuummiittut toqorarsimapput.

Aluminiumik aatsitsivimmi Ajkami aluminiumik katersivik ataasinngormat aserormat tamanna pivoq.Ajutoornermi inuit sisamat toqupput, kingornalu qarsutsisoqarmat 100-nit amerlanerit aqqunartiterput.

Ajutoorneq avatangiisitigut ajunaarnersuartut taaneqarpoq, ajunaarnersuullu taassuma kuussuarmi Donauimi ataqatigiinneq ajoquserujussuarsinnaavaa.