Aluminiuliorfissap isumaqatigiissutigineqarnera NuSuKamit iluarineqarpoq

Aluminiuliorfissaq pillugu Inatsisartuni ullumi oqallittoqarmat, ataatsimut isigalugu partiit isumaqatigiittorujussuupput. Aluminiuliorfissarlu pillugu isumaqatigiittoqarnera Nunaqavissut Suliffiutillit Kattuffiannit nuannaarutigineqarpoq.
Allattoq Mads Lynge
marsip 14-at 2008 15:39

NuSuKap siulittaasua Gerth B. Lynge ima oqarpoq:

- Aluminiuliorfissap sumiiffissarsineqarnera, Alcoap nunatsinniissinnaanera, misissueqqinnissarlu isumaqatigiissutigineqarnera assut nuannerpoq, isumaqatigiinniartoqarsinnaalerporlu, NuSuKap siulittaasua Gerth B. Lynge oqarpoq.

Suliassat agguataarneqarneri sorpiaanerallu paaserusullugit NuSuKa Greenland Development suleqatigalugu maanna ataatsimeeqateqassaaq.

- Islandimi aatsitsiviliortoqalermat suliffeqarfiit atorneqartut Islandimeersut 10 procentiunngillalluunniit, tamanna uagut qaangertariaqarparput, Gerth B. Lynge oqarpoq, nangillunilu:

- Ataatsimiititaliamik pilersitsinikkut paasissutissat Kalaallit Nunaannit atorneqarsinnaasut eqqortut aqqutissiuunneqarsinnaassapput, NuSuKap siulittaasua oqarpoq.

Piginneqatigiissinnaanissamut isuma Inuit Ataqatigiinnit Demokraatiniillu suli isummerfigineqanngilaq, sukumiinerusumik misissuisoqareerpat isummerniartoqarami.

Misissueqqinnissanut atugassat 100 millioni koruunit akuersissutigineqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq