Aluminiuliorfiliornissat malinnaaffigineqarsinnaalerput

Suliffeqarfik siunnersuinermik ineriartortitsinermillu ingerlataqartoq, Greenland Development, Namminersornerullutik Oqartussanik sullissisuusoq, nittartakkamik pilersitsimavoq uani iserfigineqarsinnaasumik: aluminium.gl, taama ilisimatitsipput Nunatsinni Takornariaqarnermi Inuussutissarsiornermilu Siunnersuisoqatigiit.

Tamanna pivoq Naalakkersuisut qanittukkut amerikamiut suliffeqarfiutaanik Alcoamik atsioqateqareersullu.

- Aluminiumik aatsitsivissatut pilersaarut aningaasarsiornikkut avatangiisitigullu ingerlanneqarluarsinnaasoq paasinarsissappat, nunatta oqaluttuarisaanerani suliffissuaqarnikkut aatsaat taama annertutigisumik aningaasaliisoqassaaq. Taamaattumik pingaaruteqarpoq suliap ingerlanneqarnerani kikkut tamarmik paasisaqarsinnaanissaat aamma aluminiumik aatsitsivissap tamatumunngalu atatillugu erngup nukissiorfiliorniarnermut atatillugu oqalliseqataasinnaanissaat, taama oqarpoq Greenland Developmentip pisortaa Flemming Drechsel.

Alcoap nittartagaanut nunarput aamma ilanngunneqarsimavoq. Tassami suliffeqarfissuup nunarput nittartakkami uani ilaatilersimavaa: www.alcoa.com. Flemming Drechsel oqarpoq, suliassap ineriartornera peqatigalugu nittartagaq annertusarneqassasoq, paasissutissiisalernissarlu oqaatsivut atorlugit aamma pilersaarutaanerarpaa.

Nittartagaq aluminium.gl aallaqqaammut kalaallisut danskisullu allassimasarpoq, tuluttulli aamma piffissami qanittumi allassimasalernissaa pilersaarutaasoq oqaatigineqarpoq.