Alumiiniumik aatsitsiviliortoqarnissaa assortuussutaavallaanngilaq

Nunatta aningaasaqarnera aluminiuliorfissap pitsaanerulersissagaa, Demokraatit isumaqarput.

- Demokraatini paatsoorneqarsinnaanngitsumik isumaqarpugut, nunatsinni alumiiniumik aatsitsiviliornissaq ineriartortitseqqinnissamut pingaaruteqarluinnarpoq, tamatumalu nassatariumaaraa maannakkutut aningaasarliukujukkunnaarnissarput, Demokraatineersoq Justus Hansen oqarpoq.

Atassut isumaqarpoq, suliffissat kulturikkut kingornussassanit pingaarnerusut.

- Isertornagu oqaatigissavara pingaartikkatsigu, siunissami suliffissanik ataavartunit pilersitsiffiusinnaasut eqqarsaatigalugit, nunat siusinnerusukkut siulitsinnit atorneqartarsimaneri tunngavigalugit eqqissisinneqarsimagaluit kingumut inuussutissarsiornissamut atorneqarsinnaalersinnappata, Atassummeersoq Siverth K. Heilmann oqarpoq.

Inuit Ataqatigiit suli eqqarsarnartoqartitsipput, annertunerusumillu misissuisoqarnissaa ujartorlugu.

Siumup qularutiginngilluinnarpaa, aatsitsivissaq piffissami ungasippallaanngitsumi piviusunngussasoq.