Alumiiniuliorfissuit arlallit nunatsinnut saaffiginnipput
Amerikamiut alumiiniuliorfissuat, Alcoa, Kalaallit Nunaanni alumiiniuliorfiliornissamik kisimi pilersaaruteqanngilaq.
Alumiiniuliorfissuit arlallit Namminersornerullutik Oqartussanut saaffiginnissimapput – aamma suliffeqarfissuit Europameersut ilaat.
Kalaallit Nunaannut taama soqutiginninnermut pissutaavoq, erngup nukinga atorlugu nunatsinni nukissiorfiliortoqassappat, innaallagissamik akikitsumik annertuumik immaqa atuisalersinnaanissaq. Alumiiniuliorfeqaleraluarpammi erngup nukinganik akikitsuaqqamik atuisoqarsinnaanngussagaluarpoq. Alumiiniuliortoqaraangammi nukippassuit atorneqartarput.
Alumiiniuliorfissuarmik Alcoamik isumaqatigiissut Namminersornerullutik Oqartussat juulimi atsiorpaat, taamaalilluni suliffeqarfissuaq alumiiniuliorfiliorsinnaanermut akuersissummik pivoq.
Kangerlussuup kujataatungaani Sarfartuup Tasersua eqqaa Alcoami sulisut qaammatip tulliani misissuivigileriissavaat.
Alumiiniuliorfissaq tassani inissinneqassagunarpoq.
