Alumiiniuliorfimmut aningaasaliissutit ima atorneqassapput

Aluminiuliorfissamut tunngatillugu misissuinissamut 375 millioni koruunit Naalakkersuisut aningaasanut inatsisissami immikkoortikkumasaat, aatsaat atorneqassapput nunatta piginneqataanissaanik Inatsisartut aalajangerpata.
Allattoq Jens Thorin
aggustip 18-at 2008 15:43

Aluminiuliorfissamut atatillugu misissuinernik aasaq manna aallartitsisoqareerpoq. Isuani Nunap sannaanik aasaq misissuisoqalermat aallaarsimaarfiliortoqarpoq. Immap tatsillugu itissusiinik kiisalu tinittarnermik ulittarnermillu misussuinerit juulimi aallartinneqarput. Pilersaarut malillugu misissuinernut tamakkununnga 125 millioni koruunit atorneqassapput, affai Alcoamit affaalu Namminersornerullutik Oqartussanit akilerneqassallutik. Aluminiuliorfissaq pillugu sulianik ataqatigiissaarisup, Namminersornerullutik Oqartussat pigisaata Greenland Development-ip, pisortaa, Flemming Drechsel, taama oqaluttuarpoq.

Aasaq mannali misissuinissat naammassineqanngillat, qulimiguulinnik umiatsianillu naammattunik attartugassaqanngimmat sulisussakimmallu. Misissuinissat ilaat aasap tullianut tassa kinguartinneqarput.

Misissuinernut, aasaq manna naammassisanut, Namminersornerullutik Oqartussat 60 millioni koruunit tamaalillutik atoreerpaat. Millionerpassuilli, aappaagu misissuinissanut atugassat, aatsaat atorneqassalersinnaalissapput, Inatsisartut alumiiniuliorfissamut piginneqataaniarlutik aalajangerpata. Tamanna 2009-mi ukiakkut pissaaq. Akuersisoqarpat, misissuinernut aningaasartuutit Namminersornerullutik Oqartussat Alcoa-llu avissavaat. Tassalu 375 millioni koruunit amerlanersaat tassunga atussapput.

Misissuinerujussuartoqareersorli pilersaarut piviusunngunngitsoorpat, aningaasat Naminersornerullutik Oqartussat annaassavaat.

Naalakkersuisulli aningaasanut inatsissatut siunnersuummi erseqqissarpaat, ilisimasanik pingaarutilinnik pissarsissasoqassasoq, allatigut atorneqarsinnaasunik.