Alluitsup Paani uuliamik mingutsitsisoqarpoq
Alluitsup Paani uuliamik annertuumik mingutsitsisoqarpoq nunaqarfimmilu najugallit uuliasunnersuarmik naamasaqaannavipput. Naak, ippassaq ullaakkulli mingutsitsineq paasineqaraluartoq Nanortalimmi qatserisartut unnukkut aatsaat nalunaarfigineqarsimapput.
Tankeqarfimmi pisortaagallartup kina saaffigissanerlugu nalugamiuk aatsaat ullaaq nalinginnaasumik suliartortarfik nallermat mingutsitsineq nalunaarutigisimallugu radioaviisimut oqaluttuarpoq.
Alluitsup Paani nunaqarfimmi aqutsisut siulittaasuat Kirstine-Marie Jørgensen oqarpoq piniartut eqqartoraat uulia 5 centimeteritut issussuseqartoq imaaniittoq maannakkullu iliuuseqarfigineqannginnera sivitsormat 20 kilometerit pallillugit ungasitsigisumut siaruaassimanissaa ilimagineqartoq.
Nanortalimmi qaserisarfiup ittua Eigil Knudsen oqarpoq, qatserisarfik ippassaq unnukkut arfininnguukkaa aatsaat nalunaarfigineqarsimasoq, nunaqarfimmi politiit ikiortaannit. Massakkullu uulia katersorneqarnerarpaa ajutoornerlu qanoq atsiginersoq paasiniarluarneqarluni Nanortalimmi atortorissaarutit nassarlugit saliiartornissaq pisariassanersoq paasinarsiumaartoq Eigil Knudsenip radioaviisimut oqaatigaa.
