Alluitsup Paani tillinniaqattaarsimanerit eqqartuussivimmi suliarineqalissapput

Alluitsup Paani Pilersuisup quersuani tillinniaqattaartarsimanerit eqqartuussivimmi suliarineqarnissaat piareerpoq.
aggustip 06-at 2007 15:13

Nanortalimmi politiit inuusuttut arfinillit, Alluitsup Paani Pilersuisup quersuanut arlaleriarlutik tillinniartarsimasutut pasivaat, 2006-imi septemberimiit ukioq mannamut apriilip qaammataa ilanngullugu. Politiit oqarnerat malillugu inuusutut ilai arlaleriarlutik tillinniartarsimapput, ilaat ataasiaannarlutik peqataasarsimallutik.

Tillinniat cigaretsinik imigassanillu tilligartarsimapput, ilaatigullu tillinniarnerminni trucki aallaruteriarlugu Pilersuisup quersuata matua aserorlugu isersimallutik.

-Pasineqartut apersortarsimavavut qanorlu pineqaatissinneqarsinnaanerannik paasitissimallutigit, tamannali iluaqutaavallaanngilaq, tillinniaqqittarmata.

Taama oqarpoq politiit ittuat, Niels Nyvang Nielsen, Nanortalimmiit.

Nanortalimmi Eqqartuussivik Alluitsup Paanut angalatitaqarpat suliat tullianik suliarineqassapput.

Sulili ilisimaneqanngilaq qaqugu Alluitsup Paanut angalatitsisoqassanersoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq