Alluitsup Paani innuttaasut imermik unnuaru pilersorneqarsinnaassanngillat
Imeqarfimmi nakkartitsivimmi sorujuiaatip ajoquteqarneratigut Nukissiorfiit naapertorlugit minguit uumasuaqqallu piiarneqarsinnaasimanngillat, bakteeriaajaalli ingerlasinnaasimalluni. Ajoqut imeqarfimmi iluarsineqareerpoq, Nukissiorfiilli nalunaarutigaat ruujorit salikkuminaassimasut, unnuguli aqqanerninngaanniit aqagu ullaakkut arfineq-pingasut tungaanut saliisoqassanerarlugu.
Erngup aqqutai saligummik immerneqassapput, saligullu sakkortummat ulorianarlunilu imeq imerneqassanngilluinnartoq, Nukissiorfiit nalunaarutigaat.
Ruujorit saliinerup kingorna imermik minguitsumik sukumiisumik salinneqassapput, imermillu unnuap ingerlanerani pisariaqartitsivikkaanni imeqarfiup innaallagissiorfiullu eqqaani biili imermik pajuttaat uninngatinneqassaaq, tassungalu aallertoqarsinnaassalluni.
Imermik pilersuinerup nalinginnaasumik aqagu ullaakkut nalunaaqutaq arfineq-pingasunut ingerlaqqilernissaa Nukissiorfiit naatsorsuutigaat, Alluitsup Paanili atuisut imermut naqitsisumut attaveqartut imeq sapaatiuppat ullaakkut atulersinnagu erngup aqqutaa salinniarlugu minnerpaamik minutsini qulini kuutsitsisariaqassasut, Nukissiorfiit nalunaarutigaat.