Alluitsup Paani atuarfik iluarsartuutassaangaatsiarpoq
Debora Kleistip apeqquteqarnermini paaserusuppaa Naalakkersuisut atuarfiup matoqqagallartup iluarsartuunneqarnissaanut pilersaaruteqarnersut, imaluunniit nunaqarfimmi nutaamik atuarfiliortoqassanersoq. Mannami ajornartorsiut tamanna kommunimut akisoorujussuuvoq.
- Atuarfik 90-ikkut naalernerani nutarterneqarsimavoq, ukiulli arfinillit arfineq marluk ingerlanerini atuarfiup iluani oqoqalersimavoq. Ajornartorsiullu tamanna qaangerniarlugu kommunep 2010-mi iliuuseqarfigisimagaluarpaa. Ukiorli ataaseq affarlu qaangiutiinnartut atuarfik annertunerusumik oqoqaleqqissimavoq. Taammattumillu nunaqarfimmi ininik attartortariaqarsimavugut, atuartut sumiiffissaqarlutik ilinniartinneqarsinnaaniassammata, Kommunimi atuarfeqarfinni pisortaq Jens Korneliussen oqaluttuarpoq.
Ajornartorsiullu qaangerniarlugu pitsaanerpaassagaluarpoq nutaamik atuarfiliortoqaruni. Tamannali Aalajangiinissarli maanna Naalakkersuisuniippoq, maannalu ajornartorsiut qanoq iliuuseqarfiginqassanersoq Debora Kleistimit paaserusunneqarpoq.
- Atuarfimmi iluarsartuusseqqiinnarnissaq imminut akilersinnaanngilaq. Oqummimmi eqqorneqarneq qaangerniassagaanni atuarfik tamarmi isaterneqartariaqassaaq, tamaalu naqqaniit nappaqqillugu. Nunaqarfimmi meeqqat annikitsumik ikiliartorput, pitsaaneruinnassagaluarporlu atuarfimmik nunaqarfiup meeraqassusaanut tulluuttumik nutaamik sanasoqaraluaruni. Neriunarporlu Naalakkersuisut ajornartorsiut tamanna iliuuseqarfigipallakkumaaraat, taamaalillutami maani kommunimit atuartitsivissatut init attartukkagut aningaasartuutigisagullu sipaarutigisinnaalissagaluaratsigit, Jens Korneliussen naggasiivoq.
Kommune Kujallermi teknikkimi, ineqarnermi avatangiisillu pillugit pisortaq Jan Kjær sulinngiffeqarallarmat oqaaseqartissinnaasimanngilarput.
