Alluitsup Paani aallaasersortoqartoq

Tallimanngormat ualikkut tallimat arfernullu eqqaani angut aalakoortoq arlaleriarluni Alluitsup Paani seqqorpoq. Taamaaliunnginnermini ikuallattoqaraangat kalerissaarilluni toortagaq toorpaa qatserisartut aggertillugit. Qatserisartut takkukkamik takuaat ikuallattoqanngitsoq, kisiannili tusaasinnaallugu illup iluani aallaarpaluttoqartartoq. 

Inuit silamiittut timersortarfiup eqqaani illup aallaasersorfigineqartup eqqaaniittut politiiniit qatserisartuniillu qimarngussuunneqarput.

Anaanasoq oqaluttuarpoq seqqortoqaqattaalermat toqqissisimanarsimanngitsoq. Aallaasersortoq iperagaanikuulluni Alluitsup Paaniimmat arnaq kinaassutsini isertuukkusuppaa, aallaasersornikup arlaatigut qisuariarsinnaanera aarleqqutigigamiuk.

Innuttaasoq alla imatut oqarpoq:

-Aallaasersortoqareersoq sivitsunngitsoq angut taanna illoqarfimmi takuneqarsinnaalerpoq. Iperagaareersimavoq, navianarpoq ersivugut. Susoqarsimanera paasiniarneqartariaqaraluarpoq, taama angut kinaassutsiminik isertuusserusuttoq knr.gl-imut oqarpoq.  

Aallaasersortoq iperagaareerpoq.

Politimestereqarfiup Kujataanilu Politiit ittuat nalilerpaat angut aallaasersortoq inoqatiminut ulorianartorsiortitsisimanngitsoq uloriananngitsorlu.

-Aappi seqqortoqarpoq, kisianni inoqatiminut ulorianartorsiortitsisimanngilaq, illup iluaniinnaq seqqorsimavoq, inunnillu ajoqqusertoqarsimanani. Oqarasuaatikkut angut taanna attaveqarfigineqarpoq, aallaat silamut miloriuppaa politiinullu tunniutiinnarluni, taama Qaqortumi Politiit ittuat Bent Ole Kleist oqarpoq.

Aallaasersortoq toqutsinissaminik siorasaarisimanngilaq, inuillu tungaanut seqqorsimanani. Taamaammat unnuup ingerlanerani iperagaavoq.

-Susoqarsimanersoq paasereeratsigu Politimestereqarfimmilu inatsisilerituut isumasioqatigereeratsigit iperagaavoq, taama Bent Ole Kleist oqarpoq.

Alluitsup Paani pinartunik pisoqartillugu Nanortalimmi politiit ikiorsiunneqartarput, ullorli taanna politiini inussaaleqineq pissutigalugu Nanortalimmiit Alluitsup Paaliartoqarsimanngilaq. Taamaattumik Qaqortumi politiit Alluitsup Paaliarniarlutik piareersaleraluarsimapput. Politiilli paasigamikku inuit inuunerinik ulorianartorsiortitsisoqarsimanngitsoq aallarnissaagaluartik unitsiinnarsimavaat.

-Tamanna paasigatsigu taakungarnissarput utaqqisikkallarparput. Kisianni suliaq ingerlavoq, pisoq pillugu nalunaarusiortoqarpoq, piumasarissavarpullu akiligassinneqassasoq, taama Bent Ole Kleist oqarpoq.

Qanittukkut Nanortalimmi politiit Alluitsup Paaliassapput, ulloq taanna susoqarsimanersoq sukumiisumik misissorneqassammat.