Alluitsumi suliniut nalorninartorsiorpoq

- SIK peqataaniarunnaarmat suliniummut peqataasinnaajunnaarpugut. Oqartariaqarpunga periaatsit allakkajaat tunngavigalugit SIK peqataajumajunnaartoq, Danmarkimi sanaartornermik suliaqartut kattuffianni siulittaasoq John Larsen Sermitsiamut oqarpoq.

Suliniummi danskit kalaallillu sanaartornermik ilinniagaqartut Alluitsumi qatanngutigiinniat illuutitoqqaannik 1800-kkunneersunik aserfallatsaaliinissaat pilersaarutaagaluarpoq.

Taamatut aalajangerneq Nanortallip kommuniani borgmesterip Kristine Raahaugep uggoreqaa.

- Assorujussuaq ajuusaarnarpoq. Tassami pilersaarutip suliarineqarnerani suleqataalluni aamma inupparujussuit assigiinngitsut akuliusimatillugit, unitsinniarneqarnera assut tupaallannarpoq. Neriuppunga SIK-minngaanniit eqqarsaatigeqqinneqassasoq.

SIK-p peqataaniarunnaarnini aalajangiusimaannassappagu qanoq iliussanersut Kristine Raahauge aperineqarami ima oqarpoq:

- Tassa taama pisoqarnera ajuusaarutigalugu tusagassiuutinut nalunaaruteqarpugut. Neriuppugut suliap aningaasarpassuarnik naleqartussaasup aamma pitsaasumik siunertaqartup, ilaatigut ilinniartitsinermik imaqartup arlaatigut ingerlateqqinneqarsinnaanissaanut ujartueqqittoqarumaartoq, ilaatigut Namminersornerullutik Oqartussat suleqatigalugit. Taakkumi ilinniarnissamut tunngatillugu suleqataareernikuummata, Kristine Raahauge naggasiivoq.

Pilersaarutaagaluartumut 24 miliuunit koruunit aningaasaliissutaareeraluarput.