Alluitsoq iluarsaanneqalerpoq
Sulisartut Højskoleata Qaqortumiittup, Danmarkimi nunatsinnilu Sanaartornermi Ilinniarfiit aamma Danmarkimi sanaartornermi suliffeqarfissuit ilaat DAT Kartellet suleqatigalugit, marsimi apriilimiluunniit iluarsaassineq aallartilerpaat 24 millioni koruuninik missingersuusiorneqarsimasoq.
Alluitsoq 1774-imi Qatanngutigiiniat ajoqersuisoqarfiiisa pingasuusut kingullersaattut atuutilersinneqarpoq, taama allappoq Henrik Wilhjem Samuel Kleinschmidt Alluitsumi 1814–imi inuusoq pillugu atuakkiamini.
Kaj Lyberth, Sulisartut Højskoliani pisortap oqaatigaa iluarsaassinerit aallartilluinnalersut.
- Naatsorsuutigaarput illut immaqa pingasut juuni, juulip tungaanut ingerlanneqassasut, tamatuma kingorna juulimi aggutsusilluunniit aallartinnerani illut eriagisat aserfallatsaalillugit aallartinneqassapput, taama nassuiaavoq Kaj Lyberth.
Alluitsoq Kujataamiunut kommuninut pingasunut atorneqartassaaq, soorunalumi nunatsinnut tamanut aamma neqeroorutaavoq. Taakku saniasigut atuarfeqarfinnut takornariartitsinermullu atorneqassaaq.
2010–p tungaanut aserfatsaaliineq ingerlasussaammat aserfallatsaaliinerup nalaani takornarianit atorneqartassasoq Kaj Lyberth aamma oqarpoq.
- Suliat sanasunngoranianit suliarineqassapput. Kisimiilluta suliarsinnaannginnatsigit nunatsinniit Danmarkimiillu immikkut ilisimasalinnik suleqatissarsiorpugut piffissamilu qanittumi atsioqatigiinerit pisussaassallutik, taama nassuiaavoq Kaj Lyberth.
Namminersornerullutik Oqartussat, SIK, Sulisartut Højskoleat, Kujataani Kommunit pingasut, Danmarkimi aningaasaateqarfik Real Dania, Danmarkimi Tekniske skolet suliniummut aningaasaleeqataasut ilaapput.
