- Assorsuaq inuttut nipilersornerullu tungaatigut tupinnaannartumik ineriartorpunga, Aviaja Juhl AllStarsikkunni peqataasoq oqarpoq, nukarlersaaninilu misigilaamminngitsoortanngilaa.
- Nuunuutigitittaqaanga, erinarsoqatigiit akornanni asaqatigeeqaagut, kisiat aamma inersimasutut piumasaqarfigineqarlungalu pineqarpunga.
Aviaja Juhl Fynimi Efterskolemi atuarnini paariniarlugulu Københavnimi AllStarsikkunni sungiusariartortarnini imaanaanginnerarpaa.
- Soorunami qasunartaqaaq, nukarlersaallunga inuttut misilittagakippunga, tassanngaannarlu sungiusarujussualeriasaarnera Fynimiillu Københavnimut sungiusariartaqattaartarnera pikkunarpoq, kisiat nuanniitsumik misillersimanngilanga, erinarsoqatinnillu tapersersorneqangaarlunga kivinneqaqqittarpunga. Sapaatip akunneranut arlaleriarluni nalunaaquttap akunnera affarlu ingerlaaqqaarluni sungiusariartortarpoq.
- Atuarninnut sunniuteqarnerlunngitsuunngilaq, kisiat atuarnera sapinngisara tamaat paarilluarpara ullaaralaakkullu Københavnimiit aallartarpunga atuariartorlunga.
Aviaajap naalliuperaarnini imminut akilerumaartoq qularinngilluinnarpaa.
- Qularinngilluinnangajaavippara takorluulereerlugulu ajugaanissarput, soorunami Ålborgermiut qularnanngitsumik sukataassapput, kisiat aamma uagut sukataarniarpugut, Aviaja Juhl oqarpoq, imalu naggasiivoq.
- Tamaavissi tallimanngorpat erinarsorfigissavassi! Ajugaaguttalu erinarsorfigiartornissarsi qilanaaraarput.