Alloriarnermi misilitsinnerit ingerlanneqalerput
Atuarfitsialaap eqqunneqarneraniit nunatsinni 3. aamma 7. klassimi atuartut tamarmiusut sapaatip akunnerani uani tullianilu alloriarnermik taasamik siullermeerutaasumik misilitsissapput.
Meeqqat misilitsinnerminni, kalaallit oqasii, qallunaallu oqasii, matematikernerlu misilitsiffigissavaat, 7. klassenilu atuartut tuluttut misilitsissallutik. Alloriarfinni misilitsinnerit siunertaraat, ilinniartitsisut atuartullu nalilersuisarnerinut ikorfartuisarnissat, taamatullu
atuartut ataasiakkaat ilikkariartornerat inerikkiartornerallu tapersersussallugit.
Ilinniartitsisut pissusissamisoortumik siunertaqartumillu atuartitsinermut pilersaarusiortarnerat tapersersussallugu, taamaalilluni atuartut ataasiakkaat piginnaanereriigaat pisariaqartitaallu pilersaarusiornermi atuartitsinermilu isumagineqarsinnaaniassammata.
Alloriarnermik misilitsinnerit atuartitseriaatsimut Atuarfitsialammut ilaapput, misilitsinnermi atorneqartussat Inerisaavimmi ukiuni pingasuni kingullerni ineriartortinneqarlutillu misilerarneqarsimapput, ilaatigut ilisimatooq Peter Allerup, Danmarks Pædagogiske Universitetimeersoq, nunatsinnilu ilinniartitsisut misilittagaqarluartut arlaqartut suleqatigalugit.
Alloriarnermi misilitsinnerni angusinngitsoortoqarsinnaanngilaq, soraarummeernertulli ingerlanneqassanngillat, nalinginnaasumillu misilitsinnertut ingerlanneqassanatik.
Naatsumik oqaatigalugu atuartup atuartitsissutigineqartuni ataasikkaani pisinnaasai paasiniarneqassapput, taamaliornikkullu ilinniartitsisup ilimassavaa, atuartitsinermi tulliuttuni suna pingaarnerutillugu atuartitsissutigineqassanersoq.
