Alloriarnerit marluk angisuut
Alloriarnerit marluk angisuut NAMMCO-p Islandimi sapaatip-akunnerani matumani ataatsimiinnerani anguniarneqartussatut aalajangiiffigineqarput. Immikkut ittumik puisit pillugit ataatsimiititaliortoqarpoq, Kalaallit Nunaata siulliulluni siulittaasuuffigiligassaanik.
- Alloriarneq Atlantikup Avannaani miluumasut imarmiut pillugit kommissionimut – nunatsinnullumi – pingaaqaaq. Puisit itinerusumik sammineqarneq ajorput, naak amerlagaluaqisut, Aalisarnermut Piniarnermullu pisortaqarfimmi pisortaq, Amalie Jessen oqarpoq.
Alloriarnerit angisuut aapparaat arferit Atlantikup avannaani annertuumik misissuiffigineqalernissaannik aalajangerneq. Aatsaavissuaq arferit suut sumilu nassaassaanerat sukumiisumik misissorneqassaaq, Europa-mit Amerikap avannaanut – Rusland Canadalu ilanngullugit.
NAMMCO-p ataatsimeersuartitsinerani Kalaallit Nunaat kingumut uparuarneqarpoq, kitaani qilalukkat aarrillu pisarineqartartut amerlagalugit aarleqquteqarneq ersersinneqarluni.
- Uparuaatit soorunami angerlarutta nalilersussavagut aamma atorfillit akornanni. Allannguisoqassappallu tamanna politikerertatta sammiumaarpaat, Amalie Jessen naggasiivoq.
