Allorfik: Tunuliaqutarissaarneq katsorsartinnerup iluatsinnissaanut apeqqutaasarpoq
Ukiut tallimat. Imigassamik, hashimik aningaasanoornermilluunniit ajornartorsiuteqartunut Allorfik innuttaasunut akeqanngitsumik taama sivisutigisumi neqerooruteqartareerpoq. Allorfik nunatsinni illoqarfinni annerni tallimani katsorsaaveqarpoq, sapaatillu akunnerini arfinilinniit qaammatit tallimat tungaanut katsorsartittoqarsinnaavoq.
Efraim Olsen Allorfimmi pisortaavoq Nuummilu najugaqarluni. Taanna nakorsatut ilinniagaqarpoq aamma atornerluinermik, pinngitsuuisinnaajunnaarnermik nunatsinnilu isumaginninnermut tunngasunik ukiorpassuarni suliaqartarpoq.
Allorfimmi katsorsartinnissamut neqeroorutit tassaanerupput oqaloqatigiinneq kajumileritsisoq aamma inuup nammineq imminut ajornartorsiutiminullu qanoq isumaqarnera qitiutillugu katsorsaaneq.
Nammineq iliuuserisinnaasat aallaavigalugit oqaloqatigiinneq
Ileqquliussanik inooriaatsimillu allannguinissamut aalajangersinnaaneq katsorsartinnerup aallartinnerani sammineqartarpoq – allannguinissamummi tunngavilersuuteqarsinnaaneq pingaaruteqarpoq.
- Tunngavilersuutigineqartut pingaartilluinnarlugit oqaloqatigiittoqartarpoq. Innuttaasup nammineq iliuuseqarsinnaassusaa tapersersorniartaqaarput. Taanna periuseq sunniuteqarnerpaasartoq takussutissartaqarpoq, Efraim Olsen oqarpoq.
Katsorsaanerup immikkoortuata aappaani eqqarsaatit pitsaanngitsut aallaavii tunngavissiorneqarnerusarput aamma eqqarsaatit, misigissutit timilu qanoq ataqatigiinnersut paasiniarneqartarpoq – aamma aanngajaarniutinik atuerusulerfiup nalaani qanoq nakkaannannginnissaq ilinniarneqartarpoq.
Katsorsartinnermi oqaloqatigiinnissamut takkuttarnerit iluaqutaasaraluartut, taamaattoq aalaakkaasumik tunuliaquttat apeqqutaanerpaasartut, Efraim Olsen nassuiaavoq.
- Assersuutigalugu angerlasimaffeqanngikkaanni katsorsartinneq naammasiuminaassinnaavoq. Taamaattumik imigassartornani inuuniarneq ilungersunarsinnaasarpoq, Efraim Olsen oqarpoq.
Allorfik kommuninik suleqateqartarpoq, tassami pinngitsuuisinnaajunnaarneq anigorniaraanni inuunermi ajornartorsiutit assersuutigalugu suliffeqannginneq, inissaaleqineq ilaqutariinnilu akerleriinnerit apeqqutaaqataalluinnartarput.
Videokkut oqaloqatigiinneq allannguisoq
Toqqammaviit soorlu angerlasimaffeqarnerup pingaassusaa Efraim Olsenip oqaatigaa: Allanik angerlarsimaffeqateqaraanni namminerlu ineeraqaraanni pitsaasumik inuuneqarnissamut apeqqutaakkajuppoq.
- Katsorsartinneq iluatsissappat inuunermut tunngasut apeqqutaalluinnartarput. Tamassuma inuiaqatigiittut aaqqiinnissaa pikkoriffiginerussavarput, taanna oqarpoq.
Nunaqarfiit avinngarusimanerpaasut tikikkuminaannerat Allorfimmit ilisimaneqarluarpoq. Katsorsartikkusuttulli internettikkut attaveqaatit atorlugit katsorsartinnissaminnut neqeroorfigineqarsinnaapput. Aammali angalallutik katsorsaasartut periarfissaapput.
- Videokkut oqaloqateqarnerit qanimut oqaloqatigiinnertulli iluaqutaatigipput. Tamanna misissorneqareerpoq internettikkullu attaviit atorlugit katsorsaaneq iluaqutaasartoq takuneqarsinnaavoq. Taanna periuseq soqutiginaateqarluinnarpoq, nunatsinnimi innuttaasorpassuit avinngarusimasuni najugaqarput.
Kalaallit amerligaluttuinnartut meeqqat atuarfiat naammassigaangamikku ilinniagaqalertarput, tamannalu siunissami atornerluinerminnut katsorsartikkusuttut ikiliartornissaannut sunniuteqaqataalluassasoq, Efraim Olsen oqarpoq.
- Ilinniagaqarneq suliffimmillu paarsisinnaaneq aanngajaarniutinik atornerluilernissamut pinngitsoortitseqataasarpoq. Tamanna qiimmaallannartunik kisitsisinik takussutissaqarpoq, taanna naggasiivoq.