Allorfik: Imigassat matoqqaneranni katsorsartikkusuttut amerlisut

Naalakkersuisut siulittaasuata, Kim Kielsenip (S), imigassamik Nuummi, Kapisilinni Qeqertarsuatsiaanilu tuniniaaneq unitsimmagu, Allorfimmiit ernumallutik nalunaarput.

Atornerluisut ullormiit ullormut imigassartorunnaarunik erloqilersinnaaqisut, Allorfik isummerpoq.

Nuummilumi imigassanik aalakoornartortalinnik pisisinnaannginnermi katsorsartikkusuttut amerleriarput.

- Matoqqanerata nalaani saaffigineqallattaarpugut. Soorunami saaffiginnittoqartuaannarpoq, kisianni imigassat matoqqanerisa nalaani amerlanerupput, Allorfik Sermersuumi aqutsisoq, Henni Kielsen oqarpoq.

AAMMA ATUARUK Allorfik aningaasanoorajuttunut atuakkamik saqqummersitsisoq

Nuummimi imigassat matuneqanngikkallarmata inuit marluk pingasulluunniit sapaatip akunnerata ingerlanerani allorfimmi aallartikkusullutik nalunaartaraluarput.

Imigasalli matoqqaneranni saaffiginnittut tallimanik amerleriarput:

- Arfineq pingasut qulillu akornanni saaffiginnipput, Henni Kielsen oqarpoq.

Taassuma oqarnera naapertorlugu ikioqqusut ikiaroornartumik imigassamillu pinngitsuuisinnaajunnaarsimasut atuisuujunnaarnissamut saaffiginnissutigineqakkajunnerusuusarput.

Nuummili imigassat matoqqaranni aamma atuisuujunnaarniarlutik aalajangertoqarpoq.

- Ilaatigut imigassat matoqqaneri iluatsillugu unikkusuttut. Aamma qanoq iliorsinnaanerminnik apeqquteqartarput, aallartikkusullutillu.

AAMMA ATUARUK Nuummi, Kapisilinni Qeqertarsuatsiaanilu imigassat matuneqarallartut

Henni Kielsenip oqarnera naapertorlugu atuisut kisimik ikioqqullutik saaffiginnittanngillat:

- Imigassamik atuisuutillit, soorlu ilaqutaasut siarngutillattaarput, atuisuutertik qanoq ikiorsinnaanerlugu aperisarput.

Allorfik Sermersuumi aqutsisoq, Henni Kielsen KNR-imut oqarpoq.

Allorfik 2016-imi januaarip aallaqqaataa aallarnerfigalugu ammarmalli katsorsartittut maannamut 1100-pput