Allorfik aningaasanoorajuttunut atuakkamik saqqummersitsisoq
Tips og Lottonik immersuinissaminnik pinngitsuuisinnaajunnaartartut, amerlineri katsorsaavimmi malugineqartoq, Allorfimmi pisortap, Birgit Nicklasenip oqaatigaa.
- Aningaasanoortartut amerliartorput. Tamanna inuiaqatigiit peqqissusaannik misissuisitsinermi takuneqarsinnaavoq, aningaasanoorajunnermillu ajornartorsiuteqartut amerliartuinnartut maani katsorsartittarput.
Taamaattumik atuakkamik aningaasanoorajuttuunerup qaangerniarneranut iluaqutaasinnaasumik saqqummersitsipput.
- Aqussinnaanngisaminnik aningaasanoorajuttunngoriartornerminnik takunnissinnaasut atuagaq nittartakkatsinniittoq neriuppunga anillatsikkumaaraat.
Aningaasanoorajuttut amerliartortut
Atuagaq Henrik Tingleff-imit allagaasoq kalaallisuunngortitaavoq. Taassuma aningaasanoorajuttunit atorluarneqarsinnaanissaa, Allorfimmi allaffiup pisortaata naatsorsuutigaa.
- Atuakkamik atuisinnaasut amerlanerpaat angusinnaanissaat, aningaasanoorajuttuunerullu qaangerneqarsinnaanerata amerlanerpaat takusinnaalissagaat neriuutigaarput, Birgit Niclasen oqarpoq.
Nunatsinni aningaasanoorajunnermik ajornartorsiuteqartut ukiuni kingullerni amerliartuinnarput. Nunatsinni inersimasut akornanni aningaasanoorajunnermik ajornartorsiuteqartut 2005-imi 4 procentiusimariarlutik 2014-imi marloriaatingajanngorsimapput, tassa 7,2 procentimut qaffariarsimasut, Inuiaqatigiit peqqissusaannik misissuisitsinermi kisitsisit takutippaa.
Tamannalu katsorsaavimmi sulisunit aamma maluginiarneqarpoq.
- Aningaasanoorajuttut aningaasanoorajuttuunertik pillugu aliasorujussuartarput. Ilaat nikallungarujussualersinnaasarput, ilaallu aningaasanoorajuttuunertik ajornartorsiutigalugu imminut toqunnissamik eqqarsaateqartarlutik, Allorfimmi pisortaq, Birgit Niclasen oqarpoq.
Atuagaq 'Aningaasanoorajunnermiit aniguineq' allorfik.gl-imi uani aaneqarsinnaavoq.
