Alliliinissaq innuttaasunut eqquinerlussanngilaq

Sisimiup umiarsualiviata allilerneqarnissaa ukiorpassuarni kissaatigineqarsimavoq, tamannali piginnittunit, tassalu Namminersornerullutik Oqartussanit, tusaajumaneqarneq ajortarsimavoq.

Maannalu Qeqqata Kommuniata umiarsualiviup allilerneqarnerata akiata affaanut, tassa 28 millionit koruuninut, nammineerluni aningaasaleerusulerpoq.

- Ulluinnarni aningaasaqarnitsinni akilersinnaanngikkutsigit, taava attartornikkut taakku akilersinnaavagut. Uagut inissisimanerput imaakkami, Qeqqata Kommunia aningaasanik attartornikuunnginnami periarfissaa annertungaatsiarpoq, Hermann Berthelsen oqarpoq, erseqqissarlugulu Qeqqata Kommunia arlaatigut sipaarniartariaqanngitsoq.

- Taanna pissutaalluni sipaarniartoqarnissaanik eqqarsaateqanngilagut. Kisianni isumaqarpugut, aningaasaliinitsigut aningaasat takkuttussat annertunerulertussaasut, taamaalilluni siunissamut sipaarniarnissaraluagut innuttaasunut tunngassuteqartut minnerulersussaasinnaapput umiarsualiviup allilerneqarneratigut, Hermann Berthelsen taama tunngavilersuuteqarpoq.

Hermann Berthelsenip nassuiarpaa, Sisimiut umiarsualiviata allilerneqarnissaa pingasunik immikkoortortaqartoq. Umiarsualiviup allilerneqarnissaanut immikkoortoq siulleq 56,5 millionit koruuneqassaaq, taassumalu affaa, tassa 28 millionit koruunit missaat, Qeqqata Kommuniata aningaasanik attartornikkut nammineq akilerusullugu.

Qeqqata Kommuniata aningaasaqarnermut ataatsimiisitaliaata innersuussutaa kommunalbestyrelsip marlunngorpat akuerisussaavaa.

Umiarsualivik Naalakkersuisut pigivaat, taakkulu umiarsualiviup allilernissaa akilertussaagaluarlugu. Ukiorpassuarni iliuuseqartoqarsimannginnera pissutaalluni Qeqqata Kommunia nammineerluni iliuuseqarnialerpoq.

- Naalakkersuisuusartut allallu aalaajngeeqataasartut tamakkununnga tunngasunut ukiorpaalussuarni oqaluttuuttuarsimagaluarpagut. Massakkut Sisimiut umiarsualiviat illoqarfinnut allanut nallersuussinnaasatsinnut naleqqiullugu minnerpaajuvoq. Naak umiarsuit amerlanerpaat nunatsinnut tikittartut Sisimiuniittaraluartut utaqqisorpassuaqartarpoq. Umiarsualiviup allilerneratigut utaqqisut ikilisinniassavagut, tamannalu aningaasarsiornermi nunatta iluaqutissartaanik kinguneqartussaq takusinnaavarput, Hermann Berthelsen oqarpoq.

Umiarsualivik allilerneqassanngikkaluarpat susoqassanersoq Hermann Berthelsenip ima oqaatigaa:

- Raajaqarfiit avannaatungitsinni annertunerujartuinnarput, taamaalilluni tunisassiornermi umiarsualiviit sikuneq ajortumiittut avannarlersaata siunissami pinngitsoorneqarsinnaannginnera annertunerujussuanngortussaavoq. Taamaammat pinngitsoorani aalisartortagut allallu umiarsualivimmik atuisartut eqqarsaatigalugit qanoq iliuuseqartoqartariaqarpoq, Hermann Berthelsen.