-Allatulli piukkussaqarsinnaavunga, Hans Enoksen oqarpoq.

- Siunertarisimanngisaannarpara politikkikkut immikkut periuseqarniarsarissallunga, Naalakkersuisut siulittaasuat Hans Enoksen taama oqarpoq.

Hans Enoksen taama akissuteqarpoq, radioaviisimiit aperigatsinni Agnethe Davidsenip Kim Godtfredsenillu sassarnissaat sooq siunnersuutigisimaneraa.

Inatsisartunut qinersineqarnissaanut maanna Nuummi Siumup immikkoortortaqarfiata kikkut inuit piukkunnerunerlugit ujartorpai.

Ippassarlu radioaviisimiit paasivarput, Hans Enoksen piukkussaminik kaammattuisimasoq.

Inuillu piukkussai tassaapput: Nuummi borgmesteri Agnethe Davidsen kiisalu arpattartoq Kim Godtfredsen.

Taama Nuummi Siumup immikkoortortaqarfiata Inatsisartunut qinersisoqarnissaanut Hans Enoksenip akuliunnera, Nuummi siumup immikkoortortaqarfiata siulittaasuata Lars-Emil Johansenip pissusissamisuunngitsutut nalilerpaa.

Hans Enoksenilu tamanna pillugu oqarpoq:

- Qinersisartut allat kaammattuisinnaappata partiip siulittaasua kaammattuippat eqqumiitsortassaqartinngilara, siunertarisimanngisaannarparami politikkikkut immikkut periuseqarniarsarissallunga, Hans Enoksen oqarpoq.

Uummannap borgmesteriata Jens Lars Fleischerip tamanna aamma eqqumiitsortassaqartinngilaa.

- Siumup iluani arlaannaatigulluunniit iluaqutissarsiortoqanngilaq, oqarpoq.

Tamannalu ingasaallugu qisuariarnertut nalilerlugu.

Taamatuttaaq Qaqortumi Siumup siulittaasuata Lars Lundbladip tamanna pissusissamisoorsorinngilaa.

- Tamanna torrallataanngilaq, immikkoortortaqarfinnut akuliunnaveersaarnissaq pingaaruteqarpoq, assingusumillu misigisaqarsimanngilanga, oqarpoq.

Nuummi siumup immikkoortortaqarfiata aqagu unnukkut, inuit tallimat arfinillilluunniit kikkut piukkunnerunerlugit aalajangiiffigissavaa.