Allatta! - 'Inuusuttut – nunatsinni nunarsuarmilu'
Inuusuttut piukkunnartunik atuagassaaleqisarnerat unammisitsinermut tunngaviuvoq. Atuakkanik atorniartarfinni atuakkat kalaallisut allatat ikittuinnaapput atuagassatuaasullu pisoqalisimalerput. Tamanna allanngortinniarneqarpoq.
- Inuusuttut allannissamut kajumissaarineq oqaatsit pillugit suliniutitut taaneqarsinnaavoq. Qallunaatut kalaallisulluunniit allataanersoq apeqqutaanngilaq pingaarneruvoq inuusuttut Kalaallit Nunaanni ulluinnarni atukkatik pillugit allannissaat. Taamaasiornikkut inuusuttut atuarusulersissinnaallugit upperaarput. Tassami soqutiginarneruvoq ulluinnarni naapittakkanik tunngavilimmik atuarnissaq, NAPA-miit Katja Vahl oqarpoq.
Unamminermi nassiunneqartut naliliinissamut piukkunnarluartunit nalilersorneqassapput. Tassaapput atuakkiortoq Jessie Kleemann, ilinniartitsisoq Birgit Kleist Petersen, atuakkiortut peqatigiiffianni siulittaasoq Hans Anthon Lynge kiisalu taalliortoq Katti Frederiksen. Nassiunneqartunit sorliit qulit soqutiginarnerunersut taakku nalilersussavaat. Suliaqartitsilluni sammisaqarnermi ilinniartitsisuussaput Jessie Kleemann aamma Mette Moestrup.
- Neriuppugut peqataasoqarluarumaartoq sulili nalunarluinnarpoq qassit nassiussiumaarnersut. Aamma amerlassusaat uani pingaarnerunngilaq. Uani pingaarneruvoq maani nunami inuusuttut allannermut soqutiginninnerulersinnissaat. Atuaganngortinnissaa immikkut aamma suliaavoq. Nuummi eqqumiitsuliornermut ilinniarfimmi ilinniartut atuakkap assiliartassaanik sanassapput qulequtaralugu 'Inuusuttut – nunatsinni nunarsuarmilu'. Taamaasilluta Kalaallit Nunaanni inuusuttut nunarsuarmioqataaneq eqqarsaatigalugu maani najugaqarneq eqqarsaatersorfigissavaat, atuakkamik saqqummersitsisussaq Lene Therkildsen Milik Publishingimiit oqarpoq.
Allatta pillugu annerusumik atuarsinnaavutit uani: http://www.napa.gl/index.php?option=com_content&view=article&id=112&Itemid=98&lang=ka