Allat upperisaat ataqqiniarsigik! Muuamaamik titartakkat pillugit Jonathan Motzfeldt oqarpoq

februaarip 02-at 2006 10:53

Muhammed ilaarlugu titartakkat Jyllands-Postenip saqqummiussai naalagaaffeqatigiinnermi innuttaasunut tamanut nuanngitsumik kinguneqarput, inatsisartut siulittaasuat, Namminersornerlu pillugu isumalioqatigiissitami siulittaasoq, Jonathan Motzfeldt, nunat tamalaat tusagassiortunik Københavnimi katersortitsineranni oqarpoq.

Inuit amerlanngitsut tusagassiortunik katersortitsinermi peqataasimapput, Danmarkimimi naalakkersuisut Muhammed ilaarlugu titartakkat pillugit ulapaangaatsiarmata.

Jonathan Motzfeldt, naluneqanngitsutut nammineq aamma palasiusoq, oqarpoq, inuit misigissusaat upperisamik tunngaveqartut aamma ataqqineqartariaqartut.

- Oqartariaqarpunga malinnaaffigalugit tujormigalugillu, Danmarkip eqqorneqarnera assorujussuaq tujorminartutut isigaara. Taassuma saniatigut inuit aamma kikkulluunniit, kalaaliugutta, danskiugutta muuamaakkuuguttaluunniit upperisatsigut misigissutsivut tullaaralugit imaluunniit mittatigalugit inuunitta aqquteqarnissaa mianersuuttariaqarparput, Jonathan Motzfeldt oqarpoq.

-Kisianni kikkulluunniit oqaaseqarsinnaanissaminnut ammaffigineqassapput, kisianni inuit misigissutsimikkut tullaarineqassangilluinnassapput, Inatsisartut siulittaasuat naggasiivoq.

Erseqqissaatigissavarput aviisimi Sermitsiami aaqqissuisuuneq suli oqaloqatiginngikkipput Jonathan Motzfeldt oqaloqatigineqarmat.