Allat misilittagaat atorluarneqarsinnaapput

Meeqqat sumiginnangaasarneranut atatillugu Danskit isumagininnermut ministeriat ikiuiniarluni neqeroornera, nunatsinni isumaginninnermut naalakkersuisumit Tommy Marø-mit tigulluarneqarpoq.

- Taamatut isaassinera ajunngitsumik tiguara, aamma ippassaani telefonikkut oqaloqatigippugut, isumaqatigiillutalu nunani avannarlerni inunnik isumaginninnermut naalakkersuisut Savalimmiuni naapilerpata oqaloqatigiissalluta. Aamma eqqartussavara, maani nunatsinni kattuffinnik suleqateqarluta nammineerluta qanoq pilersaaruteqarnitsinnik oqaluttuutissavara, Tommy Marø oqarpoq nangillunilu:- Aamma qallunaat nunaanni meeqqat sumiginnakkat pillugit suliniuteqartarnerni, nunani allani misilittagaareersut Danamark-mi iluatsittut atorluarsinnaaneri eqqartussamaarpagut. Nunani allani suleriaasiusimasut atorlugit danmarkimi meeqqanik sumiginnakkanik ikiuiniarsimanermi atugaasimasut, Kalaallit Nunaannut naleequssarlugit atorneqarsinnaaneri aamma misissussavarput. Nunani allani misilittakkat atorluarneqarsinnaapput, Isumaginninnermut Naalakkersuisoq Tommy Marø oqarpoq. Naggasiillunilu;- Danmarkimi isumaginninnermut ministerip Eva Kjer Hansen-ip siunnersuutai, soorlu ilaqutariinnik pikkorissaasarnerit nunatsinni illoqarfiit ilaanni misilittagaqarfigineqalereerput, taakkualu aqqutissaapput pitsaasut, Tommy Marø naggasiivoq.