Allat kinguariartorfigisaanni siuariartorneq
Bank Nordikip GrønlandsBANKEN-illu aningaaserivittut namminersortutut siunissami ingerlaannarnissaq upperalugu naatsorsuutitik sinneqartoorfiulluartut aktiaatilinnullu iluanaarutissartallit qanittukkut saqqummiuppaat. Kalaallilli aningaaseriviisa europamiullu aningaaseriviisa suna assigiinngissutigaat?
-Danskit aningaaserivii ullumikkut ajornartorsiuteqartut arlallit niuerfik ingerlataqarfitsik qimallugu suliaqarsimanertik annaasaqaatigisimagaat qularanngilaq. GrønlandsBANKEN-imi Kalaallit Nunaanni aningaaserivimmik ingerlatsisuunerput immikkut pingaartillugu ingerlataraarput. Maanimi ukiuni 46-ni aningaaserivittut ingerlatsisimanerput ilisimasanik katersiffigisimavarput. Aamma kinguariartorfiusuni siuariartorfiusunilu maaniittuarnissarput nalunngilarput, taamaammat aamma aningaaseriviup nukittuumik inissisimanissaa sullitattalu inuiaqatigiillumi aamma pitsaasumik ineriartornissaat qulakkeerniarsaraarput. Inuiaqatigiit ingerlalluarpata, aamma aningaaserivik ingerlalluassaaq, GrønlandsBANKEN-ip pisortaanera Martin Kviesgaard knr.gl-imut oqarpoq.
GrønlandsBANKEN-illi siorna ingerlalluarsimanera aamma allanik peqquteqarpoq, piffissaagallartillugu iliuuseqarnissaq taakku ilagaat.
- Aningaasarsiornikkut ingerlaneriortoqaraluartoq ukiuni arlalinni ingerlalluarsinnaasimavugut, kingullermi 2012-imi aatsaat taama kusanartigisumik angusaqarluta, tamatumunnga ilaatigut pissutaavoq Danmarkimi aningaaserivimmut ikiorsiissutinut akisoorsuarnut akiliisussaasimannginnerput pappiaraativullu nalillit iluanaaruteqarfiusimanerat, pingaarnertullu aamma ilaqutariinnut suliffeqarfinnullu mikinerusunut aningaasanik taarsigassarsisitsisarnitta annertuumik siuariartorfiusimanera. Danskit aningaaserivii taamaaliorsinnaasimanngillat. Tamanna unammillersinnaassuseqarnitsinnut soorunami takussutaavoq, taamaattoqarsimanngitsuuppammi sullitavut aningaaserivinnik allanik toqqaasimassagaluarput, taamaammat GrønlandsBANKEN-ip tapersersorneqarluarneranut takussutissaavoq. Isumaqarpunga amerlanerit Kalaallit Nunaata tamarmi aningaaseriviattut isigigaatigut, Martin Kviesgaard oqarpoq.
Kalaallit Nunaanni ukiuni hundredelinni aningaasarsiorfiusimasut saniatigut allanik aningaasatigut isaatitsiffiusinnaasunik nassaartoqanngippat Nunatta aningaasaqarniarneranut innarliisupilussuussaaq. Aalisartut piniartullu inuussutissarsiornissaannut atugassarititaasut ajorsiartorput isertitaqarfiusinnaasullu allanik ilasariaqarput.
-Aningaasaqarneq pillugu Siunnersuisooqatigiit erseqqilluinnartumik oqaatiginikuuaat Kalaallit Nunaat ataatsimoortumik tapiissutit aalisarnerullu saniatigut allanik aningaasarsiorfeqartariaqartoq. Tamatumanilu
aatsitassarsiorneq kisiartaalluni aningaasaqarnerup pitsaasumut saatsinniarnissaanut isumalluutissatuaavoq. Aatitassarsiorluni suliniutit malunnaatilimmik amerlanerut inuiaqatigiinnullu aningaasaliisunullu iluaqutaasut iluatsitsiffiunngippata, aningaasaqarniarnikkut pitsaanngitsumik inississaagut, Martin Kviesgaard oqarpoq.
Siunissami aamma pisortat missingersuutaat tatineqartupilussuussapput, tamannalu Kalaallit Nunaanni innuttaasut inuuniarnermi atugaasa ajorseriarnerinik kinguneqanngitsoornaviarani. Politikerit maannagaaq ukiut koruunit 1 milliardit amigaatigilereerpaat, siunissamilu annertusiartuinnartussaalluni.
-Aningaatit ikinnerusut ikinnerusunit avitseqatigiiffineqaratarsinnaapput, aamma nunatsinnit nunasiortussapput, imaluunniit ataasiakkaat inuunianerminni atugaat ajorseriassapput, tamaasalu pinissaat ilimanarsinnaavoq. Aningaaserivimmut tamanna sulianik ikinnerusunik kinguneqassaaq, taamatullu pisoqaratarsinnaanera maannakkorpiaq misissuiffigaarput. Annaasaqaatigissaneripput imaluunniit ikilisaasariaqassanersugut, imaluunniit Nunatsinni avataanilu sulianik amerlanerusunik ingerlataqalissanersugut maannakkorpiaq oqaatigiuminaappoq. Taamatullu pisoqaratarsinnaatillugu Kalaallit Nunaanni nutaanik aningaasaleerusuttut amerlavallaarnavianngillat, taamaammat aningaasalersuisussatut "kisiartaassagunarpugut", tamannalumi aamma pitsaavallaanngilaq, Martin Kviesgaard isumaqarpoq.
