Erinarsoqatigiinnik aqutsisoq Ida Heinrich pillugu: Allat iliuuserisimanngisaannik iliuuseqarpoq

Operamik erinarsortartoq, Ida Heinrich kræftimik sivisuumik napparsimareerluni tallimanngornermi ullup qeqqata tungaani eqqissivoq.

Maligassiuisoq akornatsinniikkunnaartoq, Ida Heinrichip aqqaneq marlunnik - 13-inik ukioqarluni erinarsoqatigiinni peqataaffigisaligaanni aqutsisoq, Per Rosing isumaqarpoq.

- Erinarsortartunut allanut aqqutissiuussivoq. Amerlasuut Idamit isumasisinneqarput. Nunatsinni klassiskimik nipilersortarneq ileqquusimanngilaq, Ida Heinrichilli nunaqqatini soqutiginnilersippai, Per Rosing oqarpoq.

Per Rosingip Ida Heinrich erinarsoqatigiinnut takkuteqqaarmat naapeqqaarpaa.

- Taamanili inuusunnerminiilli erinarsornermut kajumilluarnini asanninninilu pissutigalugit erinarsoqatigiinnit allanit nuannarineqarluarpoq. Idap franskip erinniortartup Grounodip torrallataa Ave Maria tusaramiuk operamik erinarsortalerniarluni paasivaa, Per Rosing oqarpoq.

Tamanna Ida Heinrichip inuiaqatigiinnit nuannarineqarlualerneranik kinguneqarpoq. Nunatsinni operamik erinarsortartuni siullertut ilisimaneqarlualerluni.

- Tusarnaartitsisarnerani erinarsornermut tusarnaartuminullu nuannarinninnera asanninneralu ersarilluinnartarpoq. Sineriatsinni tusarnaartitsisarnikooqaaq. Tusarnaartitsisarnerini tusarnaartut Idamit naleqartinneqartutut misigisimasarput. Asanninneq illugiinni pisarpoq. Tusarnaartartuni asanninneqarfigai taakkulu Idamut aamma asannillutik, Per Rosing oqarpoq.

Per Rosingip tusarnaartitsineq immikkuullarissoq eqqaamalluarpaa, Ida Henrichilu tassani alutornarluinnarpoq. Tamanna namminersornerup eqqunneqarnissaanut ulloq ataaseq sioqqullugu juunip 20-at 2009-mi pivoq, Ida Heinrich kisimiilluni erinarsukkamik atuinermini nunatta qeqqani erinarsoqatigiit peqatigigai, Per Rosing oqarpoq.

Ida Henrichilu nunatta sinneranut sunniuteqarluarsinnaasoq, Per Rosing isumaqarpoq.

- Ida Nunatta nipilersornikkut aammali nalinginnaasumik siunissaanut assersuutaalluarpoq. Allat iliuuserisimanngisaannik takusinnaanngisaannillu iliuuseqarpoq, taamaaliortoqarsinnaavorlu. Operamit tigusilluni kalaallisoorlugu iluatsilluarpaa, Per Rosing oqarpoq.