- Allassimalertinneqarnerani oqartuaannarsinnaanngorpugut: Tamatta immitsinnut peqataatittarnissatsinnik isumaqatigiissuteqarpugut. Allassimanissaalu pingaaruteqarpoq.Assi: KNR

Allassimalerpoq: Illersornissaq pillugu Kalaallit Nunaat isumaqatigiinniaqataassaaq

Naalakkersuisut illersornissami aningaasaqarneq pillugu ukiuni arlalinni atuuttussamik nutaamik isumaqatigiinniarnerni peqataassapput. Tamanna isumaqatigiissummi nutaami ersippoq.

Pappilissami allassimalernissaa pisariaqartariaqanngikkaluarpoq, nunanut allanut tunngasunut naalakkersuisoq Vivian Motzfeldt (S) taama isumaqarpoq.

Tassa Kalaallit Nunaat Issittorlu pineqartillugit Kalaallit Nunaata isumaqatigiinniaqataatinneqartarnissaa.

Tamannali maanna isumaqatigiissutigineqartumi Vivian Motzfeldtip aamma danskit illersornissamut ministeriata Morten Bødskovip Københavnimi marlunngormat atsioqatigiissutaanni allassimalerpoq, aamma ”issittumi piginnaasanik annertusaanermik” taaneqartoq. Taamaalilluni Kalaallit Nunaat illersornissaq pillugu siunissami isumaqatigiinniartarnissani peqataatinneqartalissaaq.

AAMMA ATUARUK Immikkut ilisimasalik illersornissamut isumaqatigiissut pillugu: Ataatsimik pingaarnertut maluginiagaqarpunga

Isumaqatigiinniarnerit Folketingimi partiit illersornissaq pillugu isumaqatigiissuteqartartut akornanni maannamut pisarsimagaluarput.

”Illersornissaq pillugu isumaqatigiinniartarnissanut piareersaataasartussani Naalakkersuisut peqataatinneqartarnissaat isumaqatigiissutaavoq, tamannalu immikkut isumaqatigiissusiornikkut maajip naalernerani 2022-mi malittarisassanngortinneqassaaq,”, isumaqatigiissummi taama allaqqasoqarpoq.   

Naalakkersuisut isornartorsiuingaatsiartut

Maanna isumaqatigiissuteqarneq tunngaveqarpoq danskit naalakkersuisui Kalaallit Nunaannik peqataatitsinngivillutik Issittumi nakkutilliinerunissamut 1,5 milliardit koruuninik aningaasaliinissaq pillugu siorna isumaqatigissuteqareersullu Naalakkersuisut sakkortuumik isornartorsiuimmata.

Isornartorsiuineq kalaallit danskillu tusagassiuutaanni sammineqarpoq, suliamilu peqataatitsinnginneq Savalimmiormiunit aamma isornartorsiorneqarluni.

Illersornissaq pillugu isumaqatigiissut 

 

Illersornissaq pillugu isumaqatigiissutaasoq maanna atuuttoq 2018-miit 2023-p tungaanut atuuppoq.

 

Tassami isumaqatigiissummi pingaarnertut allaqqavoq Illersornissaqarfiup aningaasanik ukiuni taakkunani sumut atuisarnissaa.

 

Isumaqatigiinniarnerit Folketingimi partiit illersornissaq pillugu isumaqatigiissuteqartartut matoqqasumik ingerlattarpaat.

 

Tassa isumaqatigiissummi maanna atuuttumi Illersornissami aningaasat partiinit pineqartuniinnaq isumaqatiginninniutigineqarsinnapput.
 

Illersornissaq pillugu isumaqatigiinniarnerit nutaat uani qaammammi aallartippata Naalakkersuisut peqataassapput.

Suliaq danskit naalakkersuisuinik ataatsimeeqateqarnermi aamma qaqinneqarpoq, Vivian Motzfeldt tusagassiortunik marlunngormat katersortitsinermi oqarpoq.

- Kalaallit pineqartillugit kalaallinik (aallartitat, aaqq.) peqataatitsarnerup qanoq pingaaruteqartiginera ataatsimiissutigaarput.

AAMMA ATUARUK Danmarkip nunattalu illersornissamut isumaqatigiissut allannguuterpassuaqanngitsumik isumaqatigiissutigigaat

Sooq taassuma isumaqatigiissummi ilanngunneqarnera pillugu Vivian Motzfeldt aperineqarami ima akivoq:

- Allassimalertinneqarnerani oqartuaannarsinnaanngorpugut: Tamatta immitsinnut peqataatittarnissatsinnik isumaqatigiissuteqarpugut. Allassimanissaalu pingaaruteqarpoq.

Danmarkip Kalaallit Nunaatalu isumaqatigiissutigisariigaanni arlalinni minnerusumik annerusumilluunnit isumaqatigiissutigineqartareeraluarpoq suliani Kalaallit Nunaat tusaaneqartassasoq peqataatinneqartassasorlu, soorlu Namminersorneq pillugu inatsimmi 2009-meersumi allaqqasoq.

Itillimi Isumaqatigiissummi 2003-meersumi Kalaallit Nunaata Danmarkillu isumaqatigiissutaanni aamma allaqqavoq nunanut allanut tunngasunut isumannaannissarlu pillugit politikki pineqartillugu Kalaallit Nunaat sunniuteqaqataallunilu peqataatinneqartassasoq.  

Illersornissaq pillugu nutaamik isumaqatigiinniarneq ukioq manna maaji naalerpat aallartissaaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl