Allarsuup quua umimmaat tataminnaraat

Umimmaat qanoq qimaatinneqarsinnaappat? Inuppiannut Nomemiittunut apeqquterujussuaq. Suna peqqutiginerlugu Alaskami umimmaat nunap qiterpasissuani aasarsiorniarlutik aalajangersimapput.

Naak tasamani umimmaat ikiliartoraluartut, amerlasuut inuppiaat nunaanni najungarineqartunut soorlu Nomemut kujavartertalersimapput.

Uumassusileritooq Tony Gorm Alaskami Aalisarnermut uumasunullu piniagassanut Naalakkersuisoqarfimmeersoq suliassinneqarsimavoq umimmaat Nomemit qimagutsinnissaannut. Alaskami aviisimut Alaska Dispatchimut taanna oqaluttuarpoq maannakkorpiaq Nomep eqqaani umimmaat 100-t missaaniittut immikkooqatigiinnut tallimanut agguarsimasut illoqarfiup eqqaaniissallutik nuannaringaat.

Assigiingitsut atorlugit umimmaat illoqarfimmiit nigortinniarsimangaluarpai, biilit nilliasaataat atorlugit, assaat pattallugit, tukkarluni nipiliorlunilu. Nomep mittarfiani umimmaat mittarfimmiittut qatserisartut qatserutaat ikiorsiullugit serpalittarlugit qimagutsinniartarpai.

Qimaatitsiniarnermili inuusiat pullattakkat arlarsuaasat quuanik kuerakkat iluarnerpaajorpasipput - eqqumiikkaluartumik tamakku internetikkut pisiarineqarsinnaapput.

Naallu Tony Gormip nersutit ataatsimoortut illoqarfimmit ungasissumut iluatsittumik qimaatittaraluarai, umimmaat ullualunnguit qaangiutiinnartut uteqqittarput.

Umimmaat qimmit arlaqartut tukkarlugit toquttarsimagaluaraat, maannamut inunnik ajoqusiisimanngillat. Gormip oqarnera malillugu illoqarfiup innuttai marlunngorlutik avissimapput - ilaasa iluarinngikkaat allat nuannarigaat.

Ukiorpat umimmaat namminneq qimagutissapput.