Allarsuit kiangaarmat toquusanngitsoorput
Europami timmissat ukiukkut aallartartut aallanngitsoorput, qaqqarsuit uiguleriiaat Alpet apinngitsoorput sila kiangaarmat, silallu ukiuunerani taama allaanerunera uumasut allat aamma malugaat.
Spaniami nannut orpippassuarmiut allarsuit silap ukiuunerani kiannersua malugisimaarlugu toquusanngitsut amerlaqisut, spaniami allarsuarnik illersuiniaqatigiiffik FOP nalunaarpoq.
Spaniap avannaani allarsuit oktobarimiit decembari ilanngullugu toquusartartuugaluit 130-it toquusanngitsoorsimasut illersuiniaqatigiiffimmit kisinneqarsimapput.
- Allarsuit toquusanngitsoornertik kingunerlutsissinnaavaat, tassami puallarsikutsooriarlutik toquusaraangamik orsortik uumassutigisaramikku, toquusarnerminnilu 40 kilo katassinnaasarlugu. Toquusanngitsortut pualagaluarlutik aasaanerani nerisaat ukiukkut toqusarput, taamaalillunilu allarsuit perlernissaat qaninnerulissaaq, aammalu kinguaassiornerat innarlerneqarsinnaalluni, biologimut ilisimatooq Københavnip ilisimatusarfianeersoq Knud Erik Heller oqarpoq.
