Allannguitinnani ikaarsaarfissaqarnissaq kissaatigaa

juulip 19-at 2005 05:56

Angallanneq pillugu allannguisoqarujussuannginnerani ikaarsaariarnissamut periusissanik naalakkersuisut iliuuseqartariaqartut, kommuneqarfiit kattuffiata KANUKOKA-p siulittaasua isumaqarpoq.

- Arctic Umiaq Line namminersortunngorsarneqarlunilu aappaagumit kiffartuussiunnaartussaammat aappaagu imaatigut ilumut angallassisoqarsinnaanersoq nalorninarpoq taamaattumik allannguutissatut siunniunneqartut annertuallaaqaat, Lars Karl Jensen oqarpoq.

Angallannerup allannguiffigineqarnissaa atuisartunut inuiaqatigiillu aningaasaqarnerannut sunniuteqartussaammat ikaarsaariarnissamut atatillugu aaqqiinissaq silatusaarnerussasoq, KANUKOKA-p siulittaasua isumaqarpoq.

Lars Karl Jensen aamma isumaqarpoq, imaatigut angallassinermi assartuinermilu

namminersortut qanoq periarfissaqartiginersut misissuiffigineqaqqaartariaqartut.