Allannguisoqarsinnaavoq
Innarluutillit atugaat pillugit, suliareriikkanik marlunnik nangeqqeereerlutik, Isumaginninnermut pisortaqarfiup aalajangiinera, innarluutilinnik sullissinernut amerlanerusunik aningaasaliisalernissamik kinguneqarsinnaavoq.
Suliassat assigiinngitsut marluk, annertuumik innarluutilinnut immikkut ikiortissanik qinnuteqarnermi itigartitsinerusut, naliliiffigeqqitassatut Isumaginninnermut pisortaqarfimmut suliakkiissutigineqarlutik ingerlateqqinneqarmata, eqqunngitsumik aalajangernerusimasut, Isumaginninnermut Pisortaqarfik misissueqqinnermi aalajangerpoq.
Taamatut aalajangiisimanerit suliassanut assingusunut malinneqalissasoq, Nunami Namminermi Pissutsinut Allattoqarfimmi inatsisileritooq Dorthe Bang oqarpoq.
- Inatsisinik atuutsitsinermut oqilisaassineruvoq, taamaasillunilu annertuumik innarluutillit tapersersortissaqartinneqartalernissaanut atatillugu Namminersornerullutik oqartussat aningaasaliinerulersinnaaneranik kinguneqarsinnaassalluni, Dorthe Bang oqarpoq
Kommuneqarfiit kattuffianni, KANUKOKA-mi siunnersortaaneq, Kisea Bruun, oqarpoq Isumaginninnermut Pisortaqarfiup taamatut aalajangiisimanera, qanoq nalilissanerlugu nalugallarini.
- Inatsisinik allannguisoqanngilaq, inatsisinilli allatut atuisinnaanermik takunninnerulluni, pissanganarporlu kommunit qanoq iluaqutigisinnaaneraat, Kisea Bruun oqarpoq.
